Ўзбекистон, Тошкент - Batafsil.uz. Адлия вазирлиги томонидан давлат рўйхатидан ўтказилган янги миллий стандарт асосида эндиликда тарихий ва бадиий аҳамиятга эга бўлган маданий бойликларнинг расмий қиймати белгиланади.
Янги тартибга кўра, тасвирий ва амалий санъат асарлари каби кўчар бойликларни баҳолашда қиёсий, даромад ва харажат ёндашувларидан фойдаланилади. Бунда баҳолаш объектининг ҳақиқатдан ҳам маданий бойлик эканлигини тасдиқловчи санъатшунос эксперт хулосасининг мавжудлиги жараённинг энг муҳим шарти этиб белгиланган.
Ушбу тизимнинг жорий этилиши санъат асарларини тўлақонли фуқаролик муомаласига жалб қилиш, хусусан, уларни олди-сотди шартномаларида ишлатиш, гаровга қўйиш ёки суғурта қилиш каби иқтисодий муносабатларда ҳуқуқий асос бўлиб хизмат қилади. Мазкур стандарт маданий мерос объектларининг иқтисодий салоҳиятини аниқ белгилашга имкон беради.
Эслатиб ўтамиз, Президент Шавкат Мирзиёев креатив саноатни ривожлантиришнинг стратегик режасини тасдиқлаганди, унга кўра ушбу соҳанинг мамлакат ялпи ички маҳсулотидаги улуши 2030 йилга бориб 5 фоизгача ўсиши керак. Хусусан, бу жараён маданий жиҳатларни ҳам ислоҳ қилишни ўз ичига олади.
Изоҳлар мавжуд емас