Ўзбекистон, Тошкент - Batafsil.uz. Ўзбекистон Марказий банки 18 та тижорат банкига ўз расмий веб-сайтларида қонунчилик талабларини бузгани учун жарима солди. Ҳар бир банк 102 миллион сўмдан тўлайди.
Аниқланишича, банклар маълумотларни давлат тилида эълон қилиб бормайди, шунингдек, кредитни қайтариш жараёнида мол-мулкни гаровдан озод қилиш тартиби тўғрисидаги маълумотларни жойлаштирмайди.
Қоидабузарлар рўйхатига Агробанк, Анор Банк, Асакабанк, АВО Банк, Инфинбанк, Ипотека банк, Ҳаёт Банк, Garant Банк, Микрокредитбанк, Мадад Инвест Банк, Open Bank, Orient Finans Bank, Saderat Bank, Tenge Bank, Трастбанк, Туронбанк, Универсал Банк, Ziraat Bank Uzbekistan киритилган.
Марказий банк барча қоидабузарликларни бартараф этиш бўйича кўрсатмалар берди ва банкларга "Давлат тили тўғрисида"ги қонунга риоя қилиш, мижозларга ишончли ва тушунарли маълумотларни тақдим этиш муҳимлигини эслатди.
Регулятор банкларнинг веб-сайтлари шаффоф ва қонунчиликнинг барча меъёрларига мувофиқ бўлишини бундан буён ҳам қатъий назорат қилишини таъкидлади.
Эслатиб ўтамизки, октябрь ойида жиноий фаолиятдан олинган даромадларни легаллаштиришга, терроризмни молиялаштиришга ва қурол-яроғ тарқатишни молиялаштиришга қарши курашиш қоидалари, шунингдек, мижозлар билан муносабатларни тартибга солувчи талабларга риоя қилмаслик билан боғлиқ қоидабузарликлар учун саккизта банк жаримага тортилган эди.
Изоҳлар мавжуд емас