Ўзбекистон, Тошкент – Batafsil.uz. Хоразм вилоятида шоли етиштирувчилари давлат томонидан қўшимча қўллаб-қувватланади. Бу ҳақда 17 февраль куни Вазирлар Маҳкамасининг тегишли қарори қабул қилинган. Бу ҳақда мухбиримиз хабар бермоқда.
Ҳужжатга кўра, лазерли текислаш қурилмаси билан ишлов берилган 1 гектар экин майдони учун сарфланган ёқилғи-мойлаш материаллари қийматининг 100 фоизи давлат томонидан қоплаб берилади. Қоплашнинг максимал миқдори бир миллион сўмни ташкил этади.
2025-2026 йилларда мамлакатимизда ишлаб чиқарилган ёки импорт қилинган замонавий шоли экгичлари ва интенсив экиш техникалари қийматининг 20 фоизини қоплаш учун давлат бюджетидан субсидиялар ажратилади. Бунда компенсация ишлаб чиқарувчидан буюртманома берилгунга қадар бир йилдан кечиктирмай сотиб олинган техникага нисбатан татбиқ этилади.
Субсидия олишда кўмаклашиш учун Хоразм вилоятининг ҳар бир туманида ишчи гуруҳлар тузилади.
Шоли етиштирувчилар субсидия олиш учун ерга лазерли текислаш қурилмаси билан ишлов бергандан сўнг беш иш куни ичида "Агросубсидия" автоматлаштирилган тизими орқали ариза топшириши керак. Туман ишчи гуруҳлари беш кун муддатда ҳужжатларни кўриб чиқиб, хулоса беради.
Субсидия ажратиш тўғрисидаги якуний қарор "Ўзагроинспекция" томонидан Сув хўжалиги вазирлиги билан биргаликда хулоса олингандан сўнг уч иш куни ичида қабул қилинади.
Замонавий техника сотиб олиш учун субсидия олган шоликорлар ундан камида уч йил давомида мақсадли ва самарали фойдаланиши шарт.
Эслатиб ўтамизки, 2024 йил август ойида президент гуруч етиштирувчиларни қўллаб-қувватлаш бўйича қўшимча чора-тадбирлар тўғрисидаги қарорни имзолаган эди.
Изоҳлар мавжуд емас