Ўзбекистон, Тошкент - Batafsil.uz. Ўзбекистон техник жиҳатдан тартибга солиш агентлиги Хитойнинг Leapmotor бренди остидаги енгил автомобилларни сертификатлашни вақтинча тўхтатган. Бунинг сабаби C16 моделида аниқланган камчиликлар бўлиб, улар автомобилнинг электроникаси ва бошқа тизимларининг ишламай қолишига, айрим ҳолларда эса уларнинг бутунлай ишдан чиқишига олиб келиши мумкин. Бу ҳақда Batafsil.uz мухбири хабар бермоқда.
Расмий баёнотга кўра, аниқланган номувофиқликлар бартараф этилгунга қадар М1 тоифасидаги Leapmotor автомобилларини сертификатлаш учун аризалар бериш тўхтатилган.
Техник жиҳатдан тартибга солиш соҳасидаги назорат инспекцияси яқинда ўтказилган лаборатория синовлари халқаро хавфсизлик стандартларининг жиддий бузилишларини аниқлаганини қайд этган. Хусусан, Leapmotor C16 электромагнит нурланиш даражаси бўйича тест натижалари рухсат этилган меъёрдан 16 баравар юқори бўлиб, бу "Ўзбекистон илмий-синов ва сифат назорати маркази" давлат муассасасининг синов лабораториясида аниқланган.
Ташқи электромагнит нурланишга чидамлилик бўйича UzTR.237-016:2017 (3-илова, 44-банд) стандарти бўйича номувофиқлик мавжудлиги аниқланган. Мутахассисларнинг тушунтиришича, электромагнит мувофиқлик хавфсизликнинг муҳим парамертларидан бири ҳисобланади, чунки автомобилнинг электрон тизимларидаги носозликлар ҳайдовчи ва йўловчилар учун хавф туғдириши мумкин.
Бундан ташқари, электромагнит нурланишнинг юқори даражаси инсон саломатлигига, шу жумладан асаб ва юрак-қон томир тизимларига салбий таъсир кўрсатиши, шунингдек, саратон касалликларининг ривожланиш хавфини ошириши эҳтимоли мавжуд.
Инспекция Ўзбекистон фуқароларини автомобиль танлашга эътиборли бўлишга ва халқаро стандартларга мос келадиган моделларга устунлик беришга чақирган. Шунингдек, транспорт воситаларини фақат барча хавфсизлик меъёрларига риоя қиладиган расмий дилерлардан сотиб олиш тавсия этилади.
Изоҳлар мавжуд емас