Ўзбекистон, Тошкент - Batafsil.uz. Ўзбекистонда фуқароларни уларнинг хабардорлигисиз фирибгарлик йўли билан расмийлаштирилган онлайн кредитлардан озод қилиш, шунингдек, шубҳали ҳисобварақларни кун-у тун блоклашни жорий этиш таклиф қилинди. Президент Шавкат Мирзиёев раислигида ўтказилаётган йиғилишда кибержиноятчиликка қарши курашиш чора-тадбирлари муҳокама қилинди.
Қайд этилишича, сўнгги беш йилда мамлакатда кибержиноятлар сони 68 баробарга ортиб, етказилган умумий зарар 1,2 триллион сўмдан ошган. Аксарият ҳолатлар банк карталари ва шахсий маълумотлар билан боғлиқ фирибгарликлар билан боғлиқ.
Президент молия тизими ва давлат хизматларида киберхавфсизликни кучайтириш, мажбурий ҳимоя стандартларини жорий этиш, шахсга доир маълумотлар билан ишлайдиган операторлар реестрини шакллантириш, улардан ноқонуний фойдаланганлик учун жавобгарликни кучайтириш бўйича топшириқлар берди.
Шунингдек, давлат раҳбари Ички ишлар вазирлигининг Киберхавфсизлик маркази салоҳиятини ошириш, кибержиноятларга қарши курашиш тизимини кучайтириш, уларни тезкор фош этиш бўйича 7 та янги экспертиза турини жорий этишни талаб қилди.
Аввалроқ кибержиноятчилар ўзбекистонликларнинг қарийб 2 триллион сўмлик ҳисоб рақамларини ўғирлагани ҳақида хабар берилган эди.
Изоҳлар мавжуд емас