Ўзбекистон, Тошкент - Batafsil.uz. Ўзбекистонда хусусий боғчаларга қатнайдиган кам таъминланган оилалар фарзандларининг ўқиш тўловлари қисман давлат томонидан қоплаб берилади.
Тегишли низом Адлия вазирлигида (2025 йил 23 октябрдаги 3693-сон) рўйхатдан ўтказилди.
Ҳужжатга кўра, ота-оналар тўловининг бир қисми Давлат бюджети маблағлари ҳисобидан қопланади. Компенсация олиш ҳуқуқига эга бўлган оилалар рўйхати ахборот тизими орқали автоматик тарзда шакллантирилади.
Компенсация миқдори 9 соатлик иш режимига эга бўлган умумий типдаги давлат болалар боғчалари учун белгиланган ота-оналар тўловининг 40 фоизини ташкил этади. Маблағлар кам таъминланган оилалар фарзандларини қабул қилаётган хусусий оилавий боғчаларга тўғридан-тўғри ўтказиб берилади.
Бунда бундай ўринлар сони Мактабгача ва мактаб таълими вазирлиги ҳамда боғча ўртасида тузилган шартномада белгиланган умумий ўринлар сонининг 15 фоизидан ошмаслиги лозим.
Аввалроқ Ўзбекистонда кам таъминланган оилалар фарзандлари қатнашадиган тўгараклар харажатининг 80 фоизгача қисмини қоплаб бериши мумкинлиги ҳақида хабар берилганди.
Изоҳлар мавжуд емас