Ўзбекистон, Тошкент - Batafsil.uz. Президент раислигида ўтказилган йиғилишда муқаддас Рамазон ойи бошланиши муносабати билан ички бозорда озиқ-овқат маҳсулотлари нархининг асоссиз ошиб кетишига йўл қўймаслик ва аҳолини арзон маҳсулотлар билан таъминлаш асосий вазифа этиб белгиланди.
Давлат раҳбари Рамазон ойининг маънавий аҳамиятига алоҳида тўхталиб, ушбу кунларда халқимизга енгиллик яратиш зарурлигини таъкидлади. Президентнинг топшириғига биноан, келаси ҳафтадан бошлаб республиканинг барча ҳудудларида кенг кўламли чора-тадбирлар амалга оширилади.
Рамазон ойи учун барча деҳқон бозорлари ва йирик савдо комплексларида асосий озиқ-овқат маҳсулотлари сотиладиган махсус ярмаркалар ташкил этилади.
Шу боис, саховат ва меҳр-оқибат ойида нарх-наво барқарорлигини сақлаш бўйича мутасаддиларга қатъий вазифалар юкланди.
Бозорларга маҳсулотларни узлуксиз етказиб бериш ва захираларни шакллантириш бўйича тизимли ишлар йўлга қўйилади.
"Кейинги ҳафтадан муборак Рамазон ойи бошланади. Саховат, меҳр-оқибат ва шукроналик рамзи бўлган ушбу муқаддас кунларда ички бозорларда нарх-наво барқарорлигини таъминлаш ҳар қачонгидан ҳам муҳим", — деган Президент.
Мазкур ташаббус аҳолининг ижтимоий ҳимоясини кучайтириш ва байрам кунларида дастурхонлар тўкинлигини таъминлашга қаратилган. Раҳбарлар ушбу жараёнда тадбиркорларга шароит яратиш ва маҳсулотларнинг бозорларга арзон нархларда кириб келишини таъминлашга шахсан масъул этиб белгиланган.
Аввалроқ Туркий давлатлар ташкилотига (ТДТ) аъзо мамлакатлар Мусулмонлар диний идоралари раҳбарлари кенгаши Самарқандда бўлиб ўтган йиғилишда 2026 йилги Рамазон ойи ва Ийд ал-Фитр (Рўза ҳайити) санасини биргаликда белгилагани ҳақида хабар берган эдик.
Изоҳлар мавжуд емас