Ўзбекистон, Тошкент – Batafsil.uz. Тошкентда юқори технологияли ишлаб чиқаришларга эга янги саноат зонаси, шунингдек, пойтахтнинг саккизта туманида гастрономик ва ҳунармандчилик кўчалари пайдо бўлади. Бу ҳақда мухбиримиз хабар бермоқда.
Президент матбуот-хизматининг хабар беришича, кеча Шавкат Мирзиёевга Тошкентда саноат, хизмат кўрсатиш ва инфратузилмани ривожлантиришга қаратилган ҳужжатлар лойиҳалари тақдим этилган. Давлат раҳбари уларни маъқуллаган.
Тақдимотда пойтахтнинг саноат салоҳиятини ошириш учун "Янги авлод" махсус саноат зонаси ташкил этилгани ҳақида маълумот берилган. 664,5 гектар майдондаги саноат зонаси ҳудудида юқори технологияли ишлаб чиқаришлар жойлашган бўлади.
Уларни яратиш учун тўғридан-тўғри 1,5 миллиард долларлик хорижий инвестицияларни жалб қилиш режалаштирилган. Янги объектлар 2,5 мингта янги иш ўрни яратиш, йилига 1 триллион сўмдан ортиқ саноат маҳсулотлари ишлаб чиқариш ва 5 миллион долларлик экспортни амалга ошириш имконини беради.
Пойтахтда туризм хизматлари ва инфратузилмасини ривожлантириш учун Миробод, Олмазор, Чилонзор, Учтепа, Шайхонтоҳур, Юнусобод, Яккасарой ва Яшнобод туманларида тегишли чора-тадбирлар дастурини амалга ошириш режалаштирилган.
Хусусан, ушбу ҳудудларда гастрономик туризм ва ҳунармандлар кўчалари ташкил этилади, замонавий савдо ва хизмат кўрсатиш объектлари, меҳмонхоналар, каналлар бўйлаб яшил ва дам олиш масканлари барпо этилади.
Президентимиз ушбу ишларни маҳаллалар даражасида ташкил этиш, уларнинг ўсиш нуқталарини аниқлаш, муайян фаолият турларига ихтисослаштириш зарурлигини таъкидлади. Пойтахт ҳудудларини ободонлаштириш учун "Андижон тажрибаси" қўлланилади.
Изоҳлар мавжуд емас