Ўзбекистон, Тошкент – Batafsil.uz. Зўравонликка қарши NeMolchi.uz лойиҳаси асосчиси Ирина Матвиенко ўлдириш таҳдиди туфайли вақтинчалик Ўзбекистонни тарк этишга мажбур бўлган. Бу ҳақда мухбиримиз хабар бермоқда.
24 апрель куни Матвиенко таҳдидли хабар олган. Номаълум шахснинг ёзишича, ойнинг охиригача унга Матвиенкони ўлдириш топшириғи берилган эмиш. Акс ҳолда хабар муаллифининг оила аъзолари ўлдирилар эмиш.
“Ўлдирилишим ҳақидаги хабарни олганимдан сўнг, ҳатти-ҳаракатим ўзгарди. Даставвал, бу хабарга кимнингдир ҳазили сифатида қарамоқчи эдим. Лекин бирибир, юришга қўрқиб қолдим. Лифтдан фойдаланмасликка ҳаракат қилдим. Ҳаттоки эримдан қўшимча ёритигичлар ўрнатишни ва умумий эшикка қулф қўйишни илтимос қилдим”, - деди Матвиенко.
Ўтган хафтада психолог билан суҳбатлашгач, Матвиенко охирги қарорга келган.
“Психологнинг таъкидлашича, хабар услуби психопатга ўхшаб кетади. Жорий баҳорда руҳий касалликларнинг авж олиши одатдагидан кўпроқ эмиш. Ўша психопат ҳақиқатан ҳам ўлдириши мумкинлиги боис, жазирама кунларгача кутиб туришни тавсия қилди. Айтишларича, иссиқ ҳавода руҳий касаллар ўзига келаркан. Шунинг учун бир неча ҳафтага мамлакатдан кетишга қарор қилдим. Ўйлайманки, тезда ва албатта қайтаман. Мен хавфсиз жойда ўзимга келиб олишим керак”, - деди у.
Матвиенконинг қўшимча қилиб айтишича, Телеграмдаги аноним таҳдид унга шунчалик таъсир қилишини ўйламаган экан.
“Хавфсизлигим учун Ўзбекистондан кетаман, деб асло ўйлаганим йўқ. Биламан, келаси гал бундай хабарларга енгилроқ муносабатда бўламан. Лекин айни ҳолатда шундай қилишим лозим”, - дея якунлади у.
Ҳозирда Матвиенко Грузияда бўлиб турибди.
Изоҳлар мавжуд емас