Ўзбекистон, Тошкент – Batafsil.uz. Ўзбекистон МСК ўз вакилларини АҚШдаги президентлик праймеризларида кузатувчи сифатида юборган. Бу ҳақда мухбиримиз хабар бермоқда.
МСК раиси Зайниддин Низомхўжаев бошчилигидаги делегация Калифорнияга ташриф буюрган. Қўмита вакиллари тайёргарлик жараёни билан танишадилар ва АҚШда бўлиб ўтадиган президентлик сайловларида овоз беришда кузатувчи сифатида иштирок этишади.
Фаолиятининг биринчи кунида улар АҚШ сайловларига кўмаклашиш комиссияси аъзоси Кристи Маккормик ва Лос-Анжелес округи котиби Дин Логан билан учрашишган. Улар меҳмонларни АҚШ сайлов тизими, сайлов маъмуриятларининг асосий вазифалари ва функциялари билан таништиришган.
АҚШда президентлик праймеризлари штат даражасида ўтказиладиган бирламчи президентлик сайлови бўлиб, унинг натижаларига кўра делегатлар умуммиллий партия конвенциясига юборилади, у ерда президентликка ягона партия номзоди аниқланиши керак.
АҚШда давлат раҳбари тўғридан-тўғри сайловчилар томонидан эмас, балки сайловчилар коллегияси томонидан сайланади. Ноябрь ойининг биринчи сешанба куни сайловлар бўлиб ўтади, унда ҳар-бир штат аҳолиси Конгрессга қанча вакил юборса, шунча сайловчиларни коллегияга сайлайди. Калифорния энг кўп сайловчиларни юборади-55 кишини.
Лос-Анжелес округи котибининг идораси округ сайлов маъмурияти вазифасини бажаради. У барча даражадаги сайловларни ташкил этиш ва ўтказишни таъминлайди.
Калифорния штатидаги праймеризда овоз бериш 5 мартга белгиланган. Сайлов бюллетенлари аллақачон сайловчиларга почта орқали юборилган. Сайлов бюллетенида штат ва маҳаллий даражадаги номзодларнинг катта рўйхати, шунингдек, тасдиқлаш ёки рад этиш масалалари, шу жумладан партиянинг президентликка номзодлари ва ноябрь ойида АҚШ Сенатига очиқ праймериз учун энг яхши икки номзодлар кўрсатилади.
Тўлдирилган бланкларни сайловчилар овоз бериш марказларига олиб келишлари ва муддатидан олдин овоз бериш даврида ёки сайлов куни шахсан овоз беришлари мумкин. Бунинг учун округ ҳудудида 644 та овоз бериш маркази ташкил этилган: улардан 119 таси сайловдан 10 кун олдин очилган, қолган 525 таси эса 2-5 март кунлари очиқ бўлади.
Бу бюллетенларни қайтаришнинг бир нечта вариантларидан биридир. Шунингдек, сайловчилар уларни почта орқали юборишлари ёки овоз бериш марказларидаги махсус қутиларда қолдиришлари мумкин.
Ўзбекистон МСК делегацияси хорижий кузатувчилар гуруҳи таркибида Лос-Анжелес ҳудудидаги жамоат кутубхонасида ташкил этилган овоз бериш марказига ташриф буюрган. Меҳмонлар марказ ходимлари ва сайловчилар билан суҳбатлашишган, шунингдек, махсус электрон ускуналар ёрдамида овоз бериш жараёнини кузатишган.
Ўша куннинг ўзида бир гуруҳ хорижий кузатувчилар VSAP (Voting Solutions for All People - ҳамма учун сайлов ечимлари) иши билан танишишган. Бу сайловчиларни онлайн рўйхатдан ўтказиш учун электрон овоз бериш ускуналари ва қурилмаларини сақлаш, техник хизмат кўрсатиш, тайёрлаш, уларнинг овоз бериш Марказларида ишлашини мониторинг қилиш учун асосий хаб саналади.
Ташриф дастури доирасида Ўзбекистон делегацияси АҚШ сайловларида қўлланиладиган бошқа замонавий сайлов технологияларини ҳам ўрганади.
Айни пайтда республикачилар партиясидан АҚШ президенти лавозимига собиқ президент Доналд Трамп, БМТнинг собиқ вакили Никки Хейли, Техасдаги черков пастори ва тадбикор Райан Бинкли, демократлардан-ҳозирги давлат раҳбари Жозеф Байден ва Миннесота вакили Дин Филлипс даъвогарлик қилмоқда. Қолган даъвогарлар пойгадан чиқиб кетишган.
Изоҳлар мавжуд емас