Ўзбекистон, Тошкент - Batafsil.uz. Ўтган йили 341 мингга яқин педагоглар янги рақамли тизим бўйича тоифа олиш учун ҳужжат топширган бўлса-да, уларнинг 102 минг нафари малака имтиҳонидан ўта олмаган. Бу ҳақда Batafsil.uz мухбири хабар бермоқда.
Буни Президент бугун мактаб таълими соҳасидаги ислоҳотларга бағишланган йиғилишда таъкидлади.Давлат раҳбари ўқув дастурлари янгилангани, халқаро тажриба жорий этилгани, янги дарсликлар чоп этилгани, мактаблар замонавий техникалар билан жиҳозланганига қарамай, ўқитиш сифати бўйича ҳали-ҳамон саволлар борлигини кўрсатиб ўтди. Бу, айниқса, ўқитувчиларнинг касбий даражаси ва уларнинг янги методикаларга мослаша олиш қобилиятига тааллуқлидир.
Тоифаларни беришнинг рақамли ва шаффоф тизимига ўтиш объектив манзарани олиш имконини берди - имтиҳон натижалари педагогларнинг сезиларли қисми белгиланган талабларга жавоб бермаслигини кўрсатди.
Худди шундай ҳолат янги ўқитувчиларни ишга қабул қилишда ҳам кузатилмоқда. Эндиликда диплом билан боғлиқ расмий ёндашув ўрнига билим ва малакани баҳолаш тизими жорий этилди. Тест синовлари натижасида 13 минг номзоддан 6 минг нафари қониқарсиз тайёргарлик туфайли ишга қабул қилинмаган.
Президент хусусий ОТМларда педагог кадрлар тайёрлашда номутаносиблик борлигини ҳам кўрсатиб ўтди. 61 та нодавлат олий таълим муассасасида бўлажак ўқитувчилар тайёрланса-да, уларнинг бирортасида мактаб учун ўта зарур бўлган кимё, биология, физика фанлари бўйича мутахассислар тайёрланмаяпти.
Эслатиб ўтамизки, Ўзбекистонда ҳар икки йилда бир марта "Йил ўқитувчиси" ва "Касбий маҳорат етакчиси" танловлари ўтказилади. Асосий соврин - 525 миллион сўм пул мукофоти.
Изоҳлар мавжуд емас