Ўзбекистон, Тошкент - Batafsil.uz. Йил бошидан буён Ўзбекистонда алкоголь ва тамаки маҳсулотларининг ноқонуний айланмаси икки баравар қисқарган. Ҳуқуқ-тартибот идоралари ходимлари томонидан 1,4 мингдан ортиқ қоидабузарликлар аниқланган.
Бу ҳақда Иқтисодий жиноятларга қарши курашиш департаменти матбуот хизмати хабар бермоқда.
Қайд этилишича, алкоголь маҳсулотлари яширин бозорининг улуши 35 фоиздан 18 фоизга, тамаки маҳсулотлари улуши эса 19,6 фоиздан 9 фоизга камайган.
Ушбу даврда алкоголь ва тамаки маҳсулотларини қонунга хилоф равишда ишлаб чиқариш ва муомалага киритиш билан боғлиқ 1,4 мингта ҳуқуқбузарлик ҳолати аниқланган. Текширувлар давомида 885 минг дона алкоголь маҳсулотлари ва 912 минг қути тамаки маҳсулотлари мусодара қилинган.
15 та ишлаб чиқарувчи ва 29 та улгуржи корхонанинг лицензияси бекор қилинган, 7 та корхонанинг фаолияти вақтинча тўхтатилган.
Бундан ташқари, алкоголь ва тамаки бозорини тартибга солиш инспекцияси ташкил этилган. Йил бошидан буён 517 та мурожаат кўриб чиқилган, 97 та улгуржи савдо корхонаси рўйхатдан ўтказилган.
49 та субъектда электрон ҳисоблагичлар ўрнатилган, 43 та корхона видеокузатув тизими, 102 та транспорт воситаси GPS қурилмалари билан жиҳозланган.
Эслатиб ўтамизки, пойтахтдаги дўконлардан бирида ноқонуний равишда электрон сигареталар сотилган. Ҳуқуқ-тартибот идоралари ходимлари қиймати 1,5 миллиард сўмлик қурилмалар партиясини мусодара қилган.
Изоҳлар мавжуд емас