Ўзбекистон, Тошкент - Batafsil.uz. Ўзбекистонда ички ишлар идоралари ходимлари томонидан соҳаси ва ҳудудидан қатъи назар, фуқароларнинг ҳуқуқбузарликлар тўғрисидаги мурожаатларини тезкор қабул қилиш тизимини жорий этиш режалаштирилмоқда.
Бу президентнинг 5 январдаги маҳаллаларда хавфсиз муҳитни яратишга қаратилган қарорида кўзда тутилган.
Ички ишлар вазирлигига 2026 йил якунига қадар фуқароларнинг оғзаки мурожаатларини ИИО ходимларининг планшетлари орқали реал вақт режимида қабул қилиш амалиётини жорий этиш, шунингдек, тегишлилиги бўйича тезкор жавоб беришни таъминлаш топширилди.
Ҳужжат манзилли профилактика чора-тадбирларини жорий этиш ва ижтимоий профилактика самарадорлигини ошириш орқали жиноятчилик даражасини пасайтиришга қаратилган.
Қарорда қайд этилишича, 2025 йил 3 январда худди шундай ҳужжат қабул қилинганидан сўнг маҳаллаларда жиноятчилик даражаси бир йил ичида деярли 1,5 баробарга камайган.
Бундан аввал Ўзбекистонда жойларда жиноятчиликни тийиб туришда реал натижа кўрсатган ходимлар ва раҳбарларни моддий рағбатлантириш тизими жорий этилиши ҳақида хабар берилганди. Президент қарорига кўра, маҳаллаларда хавфсизликни таъминлашда ўзини кўрсатган камида 15 кишига маҳаллий бюджетлар ҳисобидан ҳар ойда пул мукофоти берилиши белгиланди.
Изоҳлар мавжуд емас