Ўзбекистон, Тошкент – Batafsil.uz. Вазирлар Маҳкамаси уй қамоғида бўлган ёки озодлиги чекланган шахсларни назорат қилиш учун электрон браслетлардан фойдаланиш тартибини тасдиқлаган. Бу ҳақда мухбиримиз хабар бермоқда.
Браслет қурилмаси масофадан туриб электрон кузатув тизимининг элементи ҳисобланади. У одамнинг жойлашувини қайд қилади, бу эса унинг ҳаракатларини реал вақт режимида кечаю кундуз назорат қилиш имконини беради.
Norma хабарига кўра, Ўзбекистонда электрон браслетларни босқичма-босқич жорий этиш 2025 йил 1 январдан бошланади.
Низомга кўра, электрон браслет одам оёғига тақилади. Шахс оёғига электрон браслетни тақиш имконияти мавжуд бўлмаган ҳолларда (суяк синиши, бошқа жароҳатлар билан тиббий муолажа кўрсатилган ва бошқалар) қўл қисмига тақилишига рухсат этилади.
Электрон браслет қўлланиладиган шахслар электрон браслетни белгиланган вақт ичида қувватлаб бориши, ўзбошимчалик билан ечмаслиги, унга зарар етказиш билан боғлиқ ҳаракатларни амалга оширмаслиги шарт. Агарда браслет бузилса ёки йўқотилса, етказилган зарарни қоплаш керак бўлади.
Электрон браслетни қуйидаги шахсларга қўллаш мумкин эмас:
-
18 ёшга тўлмаган шахслар;
-
ҳомиладор аёллар;
-
3 ёшга тўлмаган болалари бор аёллар;
-
I ёки II гуруҳ ногиронлиги бўлган шахслар;
-
тиббий кўрсатмага кўра электрон браслетни тақиш тавсия этилмайдиган шахслар (имплант қилинган кардиостимулятор ўрнатилган шахслар, юқумли тери касаллиги (аллерго контакт дерматит, тери замбуруғи ёки қичима касаллиги) бўлганлар.
Эслатиб ўтамизки, аввалроқ Ўзбекистонда маҳкумларни назорат қилиш учун электрон браслетлар ва дастурий таъминот ишлаб чиқила бошлангани ҳақида хабар берилган эди.
Изоҳлар мавжуд емас