Депутатлар давлат идоралари харажатларининг қарийб 10 триллион сўмга ошишини маъқуллаб, тезкор қарор қабул қилдилар

Ўзбекистон, Тошкент – Batafsil.uz. Олий Мажлис Қонунчилик палатаси 9 дақиқа ичида вазирлик ва идоралар харажатларини 9,98 триллион сўмга оширишни сўзсиз ва бир овоздан маъқуллашган. Ўзгартириш киритган Молия вазирлиги маблағнинг зарурлигини ҳаттоки тушунтирмаган. Бу ҳақда мухбиримиз хабар бермоқда.

Иқтисодиёт ва молия вазирлиги йил охирида депутатларга 775,8 миллион долларга тенг янги харажатлар зарурлигини асосламасдан ўзгартириш киритган.

Олий Мажлиснинг янги таркиби депутатлари ўзгартиришни бор-йўғи тўққиз дақиқа давомида кўриб чиқишган, шундан беш дақиқа Иқтисодиёт ва молия вазирининг ўринбосари Ахадбек Ҳайдаровнинг нутқини тинглашга кетган. Сўнгра бир вақтнинг ўзида учта ўқишда битта ҳам савол бермасдан ҳужжатни бир овоздан қабул қилишган.

Спикер Нуриддин Исмоиловнинг сўзларига кўра, давлат харажатларини ошириш бўйича муҳокамалар қўмиталар ва фракциялар ичида ёпиқ форматда, жамоатчилик ва журналистлар учун видео трансляцияларсиз олиб борилган.

Натижада вазирликлар, қўмиталар, агентликлар ва бошқа давлат идораларининг харажатлари 255,4 триллион сўмдан 265,4 триллион сўмгача ошган. Қўшимча 9,98 триллион сўм қуйидаги мақсадлар учун мўлжалланганлиги маълум бўлди:

• бюджет ташкилотларининг айрим хизмат турлари бўйича иш ҳақи, пенсиялар, нафақалар ва тарифларни ошириш учун – 2,43 триллион сўм;

• таълим кредитларини молиялаштириш жамғармасига ўтказмалар – 841 миллиард сўм;

• Ягона ижтимоий ҳимоя реестридаги беморларнинг аллергик ва иккиламчи иммунитет танқислиги касалликларини даволаш учун ингаляция дориларни бепул тарқатиш -30 миллиард сўм;

• маданият ва санъатни ривожлантириш, моддий-техника базасини мустаҳкамлаш, Маданият вазирлиги марказий аппарати ва минтақавий бўлинмаларини моддий рағбатлантириш учун – 100 миллиард сўм;

• иситиш мавсумида муҳтож оилаларга бир марталик ёрдам тўловлари ҳамда базавий меъёр билан электр энергияси ва газ нархларининг ошиб кетиши ўртасидаги компенсация фарқини қоплаш – 592 миллиард сўм;

• маҳаллаларда мавжуд инфратузилма масалаларини ҳал этиш учун - 1,344 миллиард сўм.

Эслатиб ўтамизки, сентябрь ойида Ўзбекистонда давлат бюджети даромадлари ва харажатлари кескин ошди: даромадлар 26,6 триллион сўмни, харажатлар эса 27,1 триллион сўмни ташкил этди.