Ўзбекистон, Тошкент - Batafsil.uz. Президент Шавкат Мирзиёев "Янги Ўзбекистон" боғидаги байрам тадбирида нутқ сўзлаб, мамлакатимиз ташқи сиёсатининг устувор йўналишларини белгилаб берди.
Марказий Осиё давлатлари билан кўп асрлик дўстлик ва яхши қўшничилик муносабатларини мустаҳкамлаш, стратегик шериклик ва ишончга асосланган муносабатларни сифат жиҳатидан янги босқичга кўтариш эътиборимиз марказида бўлади.
Президентимиз Ўзбекистон МДҲ ва ШҲТ давлатлари билан анъанавий алоқалар ва стратегик ҳамкорликни кенгайтириш ниятида эканини таъкидлади. Шу билан бирга, АҚШ, Европа ва бошқа ривожланган мамлакатлар билан савдо-иқтисодий, сармоявий, молиявий ва технологик ҳамкорликни чуқурлаштириш режалаштирилган.
Жанубий Осиё, Яқин ва Ўрта Шарқ ҳамда Африка давлатлари билан шерикликни кенгайтиришга алоҳида эътибор қаратилади. Бунинг учун ҳамкорликнинг истиқболли йўналишларини очадиган янги транспорт-логистика йўлакларини ташкил этиш режалаштирилган.
Шавкат Мирзиёев минтақадаги вазият ҳақида сўз юритар экан, Афғонистон минтақавий ва глобал хавфсизликнинг муҳим омили бўлиб қолаётганини таъкидлади.
"Биз ушбу мамлакат ҳукумати билан конструктив ва амалий ҳамкорлик олиб боришни зарур, деб ҳисоблаймиз", - деди президент.
Шунингдек, у Ўзбекистоннинг Фаластин масаласидаги позицияси ўзгармаслигини таъкидлади: "Биз Фаластин халқи БМТ резолюциялари билан мустаҳкамланган ўз мустақил давлатини барпо этиш ҳуқуқига эга эканини яна бир бор таъкидлаймиз".
Эслатиб ўтамиз, аввалроқ Шавкат Мирзиёев 31 август - 1 сентябрь кунлари Хитойнинг Тянжин шаҳрида бўлиб ўтадиган ШҲТ саммитида иштирок этишини тасдиқлаганди.
Изоҳлар мавжуд емас