Ўзбекистон, Тошкент - Batafsil.uz. 27 октябрь куни Ўзбекистон Президенти АҚШ Президентининг Жанубий ва Марказий Осиё бўйича махсус вакили Сержио Гор бошчилигидаги делегацияни қабул қилди. Учрашувда АҚШ Давлат котибининг ўринбосари Кристофер Ландау ва бошқа расмий шахслар ҳам иштирок этди.
Суҳбатда икки мамлакат ўртасидаги стратегик шерикликни ривожлантириш ва жорий йил 23 сентябрь куни Нью-Йоркда эришилган келишувларни амалга ошириш масалалари муҳокама қилинди. Сержио Гор давлат раҳбарига АҚШ Президенти Дональд Трампнинг саломи ва самимий тилакларини етказди.
Томонлар сиёсий мулоқотнинг жадал тус олгани, савдо айланмаси ўсиши ва саноат, энергетика, рақамли иқтисод ҳамда қишлоқ хўжалиги соҳаларидаги қўшма лойиҳаларни илгари суриш муҳим эканини таъкидлади. Шунингдек, хавфсизлик, терроризм ва экстремизмга қарши кураш ҳамда ноқонуний миграция масалалари ҳам муҳокама қилинди.
Учрашувда “C5+1” форматидаги саммитни келгуси ҳафта Вашингтонда ўтказиш масаласи ҳам кўриб чиқилди.
Эслатиб ўтамиз, Шавкат Мирзиёевнинг таклифига кўра Сербия Президенти Александр Вучич 28–31 октябрь кунлари расмий ташриф билан Ўзбекистонда бўлади.
Изоҳлар мавжуд емас