Ўзбекистон, Тошкент - Batafsil.uz. 2022 йил март ойида Тошкентнинг Яшнобод туманида шов-шувли қотиллик содир этилганди. Обуначиларига Asalnoney тахаллуси билан танилган машҳур инстаблогер Асал Хўжаева ўлдирилди. Орадан уч йил ўтгач, тергов органлари жиноятнинг барча тафсилотларини очиб берди.
Ҳаммаси жимликдан бошланган. Асал онаси билан алоқага чиқмай қўйган - бу уларнинг оиласи учун ғайриоддий эди: улар ҳар куни эрталаб ва кечқурун қўнғироқ қилишарди. Аёл қизининг бандлигига ўзини ишонтиришга уринар, аммо хавотири ортиб борарди. Ўзи бошқа шаҳарда бўлгани боис, онаси яқин дугонаси- адвокатга мурожаат қилиб, у ерга бориб, ҳаммаси жойидами-йўқми текшириб келишини илтимос қилган.
Дугонаси Тошкентнинг Яшнобод туманидаги хонадонга борган. Квартира эшиги қулфланган эди. Қиз билан нимадир рўй бериши мумкинлигини тушуниб, қулфни очтиришга қарор қилинган. Эшик очилганда, остонада қон излари топилган, бу эса хавотирни кучайтирган. Улар хонадонга кириб, Асалнинг жасадини ётоқхонада топишган. Жасадда кўплаб санчилган-кесилган жароҳатлар аниқланган. Воқеа жойига зудлик билан ҳуқуқ-тартибот идоралари ходимлари чақирилган.
Гумонланувчи тезда аниқланган. У Хўжаеванинг эски обуначиси бўлиб чиққан. У қизга маҳлиё бўлиб, романтик муносабатлар ҳақида хаёл сурар, унинг суратини дўстларига кўрсатар ва улар гўёки яқин мулоқот қилишларига ишонтирарди. Аслида, улар ўртасида фақат учрашишни таклиф қилган ёзишмалар бўлган, аммо қиз бунинг учун 300 доллар сўраган. Унда бундай пул бўлмаган ва ўшанда қиз унга 10 доллар эвазига ёзишмаларни давом эттиришни таклиф қилган, аммо эркак бу пулни ҳам тўлай олмаган. Шу вақт ичида унга 50 минг сўм пул ўтказиб берган. Рад жавобидан ва қизнинг уни масхара қилгани акс этган кинояли видеодан сўнг, эркак ғазабини ичига ютиб, қотилликни режалаштирган.
Ашаддий мухлис қотилликка тайёргарлик кўришни бошлаган. У блогернинг ҳикояларини кузатиб борган, унинг жойлашувини, подъездини, камераларини ўрганган, хонадонни кузатган ва у қайси қаватда яшашини аниқлаган. Қотиллик содир бўлган куни у қиз яшайдиган қаватга чиқиб, пойлоқчилик қила бошлаган. Унинг чўнтагида Чирчиқ бозоридан олдиндан сотиб олинган ов пичоғи бўлган.
Асал эшикни очганида, эркак хонадонга бостириб кирган. У қизнинг қорни ва бўйнига бир неча марта пичоқ урган. Суд-тиббий экспертизаси етказилган жароҳатлардан ички ёрилишларни қайд этган. Бўйнига берилган зарба ўлимга сабаб бўлган – қиз кўп қон йўқотган.
Жиноятчи эрталабгача квартирада қолиб кетган. Асалнинг телефонидан тахминан 1 миллион сўм пулни ўйинга ўтказиб, 500 доллар ва унинг смартфонини олган. Заргарлик буюмларини олмаган - уларни сотиш орқали фош қилишларидан қўрққан. Эрталаб соат олтиларда у жиноят жойини тарк этган. Пичоқни уйнинг орқасига, квартирани қулфлаган қўлқоп ва калитларни ахлат қутисига ташлаган.
Қотилнинг ҳаракатлари кузатув камералари томонидан қайд этилган. У бир кун ичида қўлга олинган. Сўроқ пайтида у жиноят ҳақида батафсил маълумот берган ва адвокатининг сўзларига кўра “Агар имконият туғилса, мен буни яна такрорлаган бўлардим”, - деган.
Эслатиб ўтамизки, суд эркакни Жиноят кодексининг 97- (Қасддан одам ўлдириш) ва 164-моддалари (Ҳаёт учун хавфли бўлган зўрлик ишлатиб босқинчилик қилиш) бўйича айбдор деб топган. У 16 йилу 6 ой муддатга озодликдан маҳрум этилган.
Изоҳлар мавжуд емас