Ўзбекистон, Тошкент - Batafsil.uz. Ижтимоий тармоқларда озиқ-овқат дўкони ёнидаги эҳсон қутиси номаълум шахслар томонидан ўғирлаб кетилгани акс этган видео кенг муҳокамаларга сабаб бўлган эди. Янгиҳаёт тумани Ички ишлар органлари ходимлари томонидан ўтказилган тезкор суриштирувлар натижасида ушбу жиноятни содир этган гуруҳ қўлга олинди.
Воқеа тафсилотларига кўра, бир гуруҳ ёшлар ижарага олинган автомобиль билан Янгиҳаёт туманида ҳаракатланиб юриб, дўконлардан бирининг олдидаги эҳсон қутисига кўзи тушади. "Ёшлик — бебошлик" қабилида иш тутган йигитлар муқаддас мақсадлар учун йиғилган маблағга кўз олайтириб, қутини ўғирлаш режасини тузишади.
Гумонланувчилардан бирининг иқрорига кўра, у вазиятни ўрганиб, эҳсон қутисини кўтариб ижарага олинган машинага солаётган вақтда шериклари автомобилни ҳайдаб юборишган. Ўғри эса ҳаракатдаги машинага сакраб чиқиб олишга мажбур бўлган. Жиноят содир этилгач, ёшлар қутини очиб, ичидан чиққан тахминан 200-300 минг сўм маблағни бензин қуйиш ва ўз эҳтиёжлари учун бўлишиб олишган.
"Орттирилган" маблағ узоққа етмаган. Тегишли орган ходимлари томонидан кўрилган тезкор чоралар натижасида автомобиль ҳайдовчиси ва қутини ўғирлаган шахслар процессуал тартибда ушланган. Эндиликда улар қилган ишларидан пушаймон эканликларини айтиб, халқдан узр сўрашмоқда.
"Эҳсон қутисини кўтариб келдим, ичидаги пулни бензинга сарфладик. Ҳаммадан узр сўрайман, бошқа бу иш қайтарилмайди", — дейди гумонланувчилардан бири.
Бироқ, кеч бўлган афсус қонуний жазодан қутқариб қолмайди. Ҳозирда мазкур ҳолат юзасидан терговга қадар суриштирув ишлари давом этмоқда. Якуний натижаларга кўра, айбдорларга нисбатан қонуний жазо чораси кўрилиши таъминланади.
Бундан олдин Тошкент вилоятининг Бўка туманида яшовчи 27 ёшли фуқаро Telegram орқали сохта хайрия кампанияларини ташкил этиб, тушган маблағларни шахсий эҳтиёжларига сарфлагани ҳақида хабар берган эдик. Афсуски, пуллар болалар учун йиғилган бўлган.
Изоҳлар мавжуд емас