Ўзбекистон, Тошкент - Batafsil.uz. Бугун, 11 февраль куни кечқурун пойтахтнинг Чилонзор туманидаги савдо мажмуаси томида ёнғин содир бўлди. Бу бир ой ичида иккинчи ҳолат.
Ҳодиса ҳақида биринчи бўлиб воқеа гувоҳлари хабар беришди: қуюқ тутун ва бино томини қамраб олган аланга тасвирлари ижтимоий тармоқларда тезда тарқалди. Гап "Новза" метро бекати яқинидаги савдо объекти ҳақида кетмоқда, у ерда илгари "Маkro" ва "Мetro" супермаркетлари жойлашган, юқори қаватда эса болалар майдончаси мавжуд.
Воқеа жойига етиб келган ёнғин-қутқарув бўлинмалари зудлик билан одамларни эвакуация қилиш ва ёнғин ўчоғини қуршаб олишга киришган. Ёнғин соат 18:19 да тўлиқ ўчирилган.
Вазирликнинг расмий маълумотларига кўра, ҳодиса оқибатида ҳеч ким жабрланмаган. Ҳозирда мутахассислар томонидан ҳодиса сабаблари аниқланмоқда.
Эслатиб ўтамиз, январь ойи охирида "Aviator" савдо марказида болалар зонаси ва бир нечта умумий овқатланиш шохобчалари жойлашган мажмуанинг иккинчи қаватида ёнғин содир бўлган эди. Ўшанда икки ёшли қизча фожиали ҳалок бўлган.
Фожиадан сўнг пойтахтда ва Самарқандда оммавий ташриф объектларини текшириш бўйича кенг кўламли рейдлар ўтказилмоқда. Инспекциялар, айниқса, болалар майдончалари ва умумий овқатланиш жойларида ёнғин хавфсизлиги бузилишини аниқлайди, аниқланган объектлар камчиликлар бартараф этилгунга қадар вақтинча ёпилади.
Изоҳлар мавжуд емас