Ўзбекистон, Тошкент - Batafsil.uz. 28 июль куни кечқурун пойтахт марказида бир гуруҳ қизлар битта электросамокатда кетаётган 16 ёшли икки ўсмир йигит томонидан шилқимликка учради. Ўтиб кетаётган йигитлардан бири қизнинг кетидан урган ва қочиб кетган.
Бу ҳақда жабрланувчилардан бири Batafsil.uz мухбирига маълум қилди.
Унинг сўзларига кўра, воқеа соат 22:10 атрофида "Халқлар дўстлиги" метро бекати ҳудудида содир бўлган. Тўрт қиз ёруғ хиёбон бўйлаб кетаётганда, уларнинг ёнига бир неча бор самокатда икки йигит келиб, хавфли тезликда яқинлашиб, баланд овозда кулишган. Қисқа оғзаки жанжалдан сўнг, ўсмирлардан бири жисмоний зўравонликка йўл қўйган - қизлардан бирининг кетига уриб, воқеа жойидан қочиб кетган.
"Биз шок ҳолатида эдик. Улар аввалига бизни провокация қилишди, кейин эса улардан бири синглимни кетига урди. У йиғлаб юборди ва биз дарҳол уларнинг ортидан югурдик," - дейди воқеа иштирокчиларидан бири.
Қизлар безориларни қувиб етишга ҳаракат қилишди, лекин улар оломон орасида йўқолиб қолишди. Йўловчилардан бири содир бўлаётган воқеани пайқаб, ҳуқуқ-тартибот идораларига қўнғироқ қилган. Ўсмирлар яқин атрофда ушланиб, бўлимга олиб кетилган, у ерда жабрланувчилар уларни танишган. Улардан бири айбига иқрор бўлиб, узр сўради. Иккинчиси - алоқадорликни рад этган ва ўзини қўпол тутган.
Кейинроқ воқеа жойига ўсмирлардан бирининг отаси етиб келган. У ўғлининг аллақачон қонун билан боғлиқ муаммолари бўлганини тасдиқлади - воқеа содир бўлишидан икки кун олдин уни жанжалда қатнашгани учун бўлимга олиб кетишган. Шунингдек, эркак жабрланувчиларни аризани қайтариб олишга кўндиришга уриниб, оиласидаги оғир вазиятни сабаб қилиб кўрсатган.
Шунга қарамай, даъвогарлар ярашишдан бош тортдилар ва ишни давом эттиришни талаб қилдилар. Ҳозирда ҳолат ваколатли органларга юборилган бўлиб, тергов ҳаракатлари олиб борилмоқда. Жабрланувчилар судга чақирувни кутмоқда.
Изоҳлар мавжуд емас