Ўзбекистон, Тошкент - Batafsil.uz. Португалия терма жамоаси сардори Криштиану Роналду 2026 йилдаги Жаҳон чемпионатида сўнгги бор майдонга тушишини билдириб, фаолиятини якунлаш арафасида эканини очиқ айтди.
40 ёшли ҳужумчи шу тариқа ўзининг 25 йиллик футбол карьерасига яқин икки йил ичида нуқта қўйишини таъкидлаган. Унинг сўзларига кўра, бу қарор оиласи билан кўпроқ вақт ўтказиш истаги билан боғлиқ.
"Мен ўзимни ҳозир жуда яхши ҳис қилаяпман. Ҳали ҳам гол ураман, тезлик ва чаққонликни сақлаб қолганман. Лекин реал бўлайлик — эҳтимол, бир ёки икки йилдан кейин тўп суришни тўхтатаман", — деди Роналду Саудияда ўтказилган халқаро инвестиция саммитида.
Роналдо жорий йил июнь ойида Саудиянинг "Ал-Наср" жамоаси билан шартномасини 2027 йилгача узайтирган эди. Аммо у шу билан бирга, АҚШ, Канада ва Мексикада бўлиб ўтадиган 2026 йилги Жаҳон чемпионатини ўзининг охирги йирик мусобақаси сифатида кўрмоқда:
"Бу менинг сўнгги жаҳон чемпионатим бўлади. Ўша пайтда мен 41 ёшда бўламан. Футболга бор имкониятимни бағишладим, 25 йил давомида турли клублар ва терма жамоаларда кўп рекордларни ўрнатдим. Бу билан жуда фахрланаман. Шундай экан, келинглар, бу лаҳзадан баҳраманд бўлайлик ва уни тўлиқ ҳис этайлик.", — деган у.
Тарихда энг кўп — 143та халқаро гол муаллифи бўлган Роналду футболни тарк этгач ҳам унинг номи спорт тарихида абадий қолиши шубҳасиз.
Шунингдек, Роналду ўғли — Криштиану Жуниор ҳақида ҳам гапириб, у Португалия U-16 терма жамоасида тўп сураётганини маълум қилган.
Шу тариқа, жаҳон футболи афсонаси учун 2026 йилги чемпионат ўзи иштирок этган сўнгги халқаро саҳна бўлиши кутилмоқда.
Изоҳлар мавжуд емас