Ўзбекистон, Тошкент - Batafsil.uz. Вашингтон Жаҳон соғлиқни сақлаш ташкилотидан чиқиш жараёнини якунлар экан, ташкилот олдидаги молиявий мажбуриятларини тўлашдан бош тортмоқда.
АҚШ маъмуриятининг ЖССТдан расман чиқиши фонида ташкилот бюджетида катта миқдордаги маблағ етишмовчилиги юзага келди. Сўнгги ҳисоб-китобларга кўра, Қўшма Штатларнинг ташкилот олдидаги тўланмаган мажбурий бадаллари миқдори 260 миллион доллардан ошади. Дональд Трамп маъмурияти ушбу маблағларни тўлашни истамаслигини, чунки ташкилот ўз вақтида ислоҳ қилинмаганини таъкидламоқда.
АҚШ этакчиси дастлабки президентлик давридаёқ ковид пандемияси билан кураша олмагани учун ташкилотидан чиқишини режалаштирганди. 2020 йилда АҚШ ташкилотга тегишли хабарнома юборган, аммо Байден биринчи президентлик кунида бу қарорни бекор қилган эди.
АҚШ ЖССТ бюджетининг қарийб 15–20 фоизини таъминлаб, ташкилотнинг энг йирик молиявий ҳомийси бўлиб келган.
Трамп маъмурияти ЖССТ учун ажратилиши керак бўлган маблағларни эндиликда миллий соғлиқни сақлаш тизимини мустаҳкамлашга ва АҚШ назорати остидаги бошқа халқаро тиббий лойиҳаларга йўналтиришини маълум қилди.
Ташкилот низомига кўра, аъзо давлат чиқиб кетишидан олдин қарзларини тўлиқ узиши лозим. Бироқ АҚШ бу талабни тан олмаган. Молиявий бўшлиқ туфайли ЖССТнинг полиомиелитга қарши кураш, эпидемияларга қарши тезкор чоралар каби муҳим йўналишлари хавф остида қолмоқда.
Мазкур дастурнинг катта қисми айнан АҚШ маблағлари ҳисобидан амалга оширилар эди. Бунинг натижасида глобал миқёсда янги юқумли касалликларга қарши курашиш тизими кучсизланиши мумкин.
Халқаро экспертларнинг фикрича, АҚШнинг бу қадами ЖССТ ичида Хитой ва Европа Иттифоқининг таъсири кучайишига олиб келиши мумкин. Вашингтон эса бундан буён соғлиқни сақлаш соҳасида фақат икки томонлама келишувлар ва янги ташкил этилган Тинчлик кенгаши доирасидаги ҳамкорликка таянишини билдирган.
Изоҳлар мавжуд емас