Centre for Research on Energy and Clean Air (CREA) ва The Guardian 2025 йил октябр маълумотларига кўра, Европа Иттифоқи Россиянинг суюқлантирилган табиий гази (СТГ)нинг энг йирик харидори ҳисобланади — унинг умумий СТГ экспортининг тахминан ярми айнан Европа бозорига йўналтирилган. Кейинги ўринларда Хитой (22%) ва Япония (18%) қайд этилган.
Шу билан бирга, Европа Иттифоқи Россия қувур газининг ҳам энг йирик харидори бўлиб, унинг умумий ҳажми қитъага етказиб берилган газнинг 35% ни ташкил этади. Бу кўрсаткич бўйича Хитой (30%) ва Туркия (29%) кейинги ўринларда туради.
ЕИ таркибидаги бир қатор давлатлар Россия газига катта миқдорда маблағ сарфламоқда. Жумладан, Венгрия (393 млн евро), Словакия (207 млн евро), Франция (153 млн евро), Бельгия (92 млн евро) ва Нидерландия (62 млн евро) асосий импорт қилувчи мамлакатлар сифатида тилга олинган.
Сўнгги йилларда Франция Россия газининг учинчи йирик харидорига айланган. Мамлакат импорт қилаётган ёқилғи асосан суюқ газ кўринишида бўлиб, унинг бир қисми кейин Германияга қайта сотилган.
Шу билан бирга, АҚШ Европага суюқ газ етказиб берувчи асосий давлатга айланди. 2024 йилда Европа Иттифоқига келган СТГнинг қарийб 55% Америкадан етказиб берилган. Мутахассислар бу жараён АҚШ учун иқтисодий имкониятлар яратади ва қитъадаги компаниялар учун янги бозорларни очиши мумкинлигини таъкидламоқда.
Изоҳлар мавжуд емас