Ўзбекистон, Тошкент - Batafsil.uz. Европарламент депутати Рафаэл Глюксманн Place publique ("Жамоат жойи") партияси қурултойида сўзлаган нутқида АҚШ Францияга Озодлик ҳайкалини қайтариши кераклигини айтган. У ўз нутқида ҳозирги президент Дональд Трамп маъмурияти ўз қарорлари билан озодлик қадриятлари уларга яқин эмаслигини кўрсатаётганини таъкидлаган. Бу ҳақда Batafsil.uz мухбири хабар бермоқда.
"Биз бу ҳайкални сизга совға қилдик, аммо сиз уни қадрламаётганга ўхшайсиз", - дея Глюксманнинг сўзларини келтирмоқда AFP агентлиги.
У ўз нутқида АҚШ сиёсатини танқид қилиб, Вашингтонни Россия билан яқинлашишда айбламоқда. Унинг сўзларига кўра, АҚШ "золимлар томонига ўтишга қарор қилган". Депутат, шунингдек, Украинани қўллаб-қувватлашини билдирган.
Бундан ташқари, франциялик сиёсатчи Трамп маъмуриятини ўзининг илмий эркинлигини талаб қилган олимларни ишдан бўшатгани учун танқид қилган.
Денгиз йўли орқали Нью-Йоркка келаётганларни кутиб олувчи 46 метр баландликдаги машҳур Озодлик ҳайкали АҚШ мустақиллигининг 100 йиллиги муносабати билан Франция томонидан Америка халқига совға қилинган эди. "Озодлик ва демократия"нинг мисдан ясалган рамзи 1886 йилда очилган.
AFPнинг қайд этишича, бир вақтлар АҚШга киришга рухсат берилишини кутаётган миллионлаб мигрантлар учун Озодлик ҳайкали "яхши ҳаётга бўлган умид рамзи"ни ифода қилган.
Изоҳлар мавжуд емас