Ўзбекистон, Тошкент - Batafsil.uz. Янги келишувга кўра, ХАМАС ҳаракати Ғазодаги туннеллар харитасини тақдим этади ва қуролли қаршиликни тўхтатиб, расмий сиёсий куч сифатида тан олинади.
Sky News Arabia телеканалининг Фаластиндаги манбаларига таяниб хабар беришича, ХАМАС ва АҚШ маъмурияти ўртасида муҳим келишувга эришилган. Унга кўра, гуруҳ ўз қурол-яроғларини топшириши ва Ғазо сектори остидаги мураккаб туннеллар тизими хариталарини очиқлаши эвазига халқаро майдонда легитим сиёсий партия сифатида тан олинади.
Ғазо секторини тарк этишни истаган ХАМАС сиёсий ва ҳарбий раҳбарлари эса АҚШ томонидан таъқиб қилинмасдан ҳудуддан чиқиб кетиши мумкин.
ХАМАСнинг баъзи полиция ходимлари ва собиқ мулозимлари, агар улар Исроил ва АҚШ хавфсизлик текширувидан ўтса, Ғазонинг янги маъмурияти таркибига киритилиши мумкин.
Фаластин миллий маъмурияти урушни тугатиш ва ҳудудни қайта тиклаш шарти билан ушбу режага қарши эмаслигини билдирган.
Исроил томони ХАМАСнинг сиёсий партия сифатида сақланиб қолишига оид бандга кескин қарши чиқмоқда. Шу билан бирга, Давосдаги форумда 19 та давлат Ғазода тинчлик ўрнатиш мақсадида ташкил этилган Тинчлик кенгаши низомини имзолаган.
Дональд Трамп эса янги ташкил этилган тинчлик тузилмасига 50 дан ортиқ давлат аъзо бўлишини кутмоқда.
Аввалроқ мухбирларимиз ушбу ташкилот ҳақида барча мавжуд фактларни - ташкил этилиш мақсадларидан тортиб, иштирокини аллақачон тасдиқлаган ёки четда қолишга қарор қилган давлатлар рўйхатига қадар тўплаганди. Хусусан, унда Ўзбекистоннинг ўрни ҳақида ҳам маълум қилинганди.
Изоҳлар мавжуд емас