Ўзбекистон, Тошкент - Batafsil.uz. 2025 йил якунида Хитой суди коррупцияга қарши кураш тарихидаги энг кескин ҳукмлардан бирини эълон қилди. Хайкоу шаҳрининг собиқ мэри Чжан Цзининг уйидан 37 миллиард долларлик бойлик топилган. Шу сабабли суд унга нисбатан энг оғир жазо чорасини қўллади.
Хайкоу шаҳрининг собиқ мэри Чжан Цзи ўта йирик миқдорда пора олиш, хизмат ваколатларини суиистеъмол қилиш ва давлат маблағларини ўзлаштиришда айбдор деб топилиб, ўлим жазосига ҳукм қилинган. Тергов жараёнида унинг ҳашаматли қароргоҳидан "Али-Бобо хазинаси"ни эслатувчи бойликлар — 13,5 тонна олтин қуймалари ва 23 тонна нақд пул (юань ва хорижий валютада) топилган.
Мутахассисларнинг дастлабки ҳисоб-китобларига кўра, Чжан Цзининг ноқонуний йўл билан тўплаган жами бойлиги 37 миллиард долларга етиши мумкин. Бу маблағлар нафақат олтин ва нақд пул, балки Хитой ва хориждаги элита кўчмас мулклар ҳамда ўнта премиум классдаги автомобиллар коллекциясини ҳам ўз ичига олади. Маълум бўлишича, собиқ мэр 2009 йилдан 2019 йилгача тадбиркорларга ер участкалари ва йирик давлат шартномаларини олиб бериш эвазига тизимли равишда пора олиб келган. Банк тизимида из қолдирмаслик учун тўловлар фақат олтин ва нақд пул кўринишида қабул қилинган.
Хитой қонунчилигига кўра, иқтисодий жиноятлар учун ўлим жазоси камдан-кам ҳолларда қўлланилади, бироқ Чжан Цзи ишидаги коррупция миқёси шу қадар даҳшатли бўлганки, суд олий жазони қўллашга қарор қилган. Ушбу ҳукм Хитой Коммунистик партияси томонидан олиб борилаётган кенг кўламли коррупцияга қарши кампаниянинг муҳим қисми бўлиб, бошқа амалдорлар учун жиддий огоҳлантириш сифатида кўрилмоқда.
Ҳозирда ҳукм якуний эмас ва Хитой Олий халқ суди томонидан қайта кўриб чиқилиши кутилмоқда. Юқори инстанция ўлим жазосини ўз кучида қолдириши ёки уни умрбод қамоқ жазосига алмаштириши мумкин.
Эслатиб ўтамиз, бундан олдин 156 миллион доллар пора олганликда айбланган China Huarong International Holdings инвестиция компаниясининг собиқ бош директори Бай Тянхуэй ҳам қатл этилганди.
Изоҳлар мавжуд емас