Ўзбекистон, Тошкент - Batafsil.uz. Бугун, 6 февраль куни Туркияда содир бўлган ва минтақанинг энг оғир фожиаларидан бирига айланган вайронкор зилзилага уч йил тўлди. 2023 йилда мамлакат жануби-шарқида 7,7 ва 7,6 магнитудали кучли силкинишлар содир бўлиб, 57 мингдан ортиқ одамнинг ҳаётига зомин бўлди ва юз минглаб одамлар уй-жойидан айрилди. Иқтисодий зарар 100 миллиард доллардан ошди, зарар кўрган ҳудудларни тиклаш ишлари ҳали ҳам давом этмоқда. Табиий офат оқибатлари нафақат Туркия, балки бутун халқаро ҳамжамият учун жиддий синов бўлиб, офат пайтида бир-бирини қўллаб-қувватлашнинг қадрини эслатди.
Зилзила эпимаркази Қаҳрамонмараш провинциясида бўлган, аммо вайронагарчиликлар катта ҳудудда, жумладан, қўшни провинциялар ва ҳатто Сурияда ҳам сезилган.
Фалокатдан сўнг Туркия ва Сурияда 9 мингдан ортиқ афтершоклар қайд этилди. Улардан баъзиларининг магнитудаси 6 баллдан юқори эди. Афтершоклар қутқарувчилар ишини мураккаблаштирди: вайроналарни тозалашни тўхтатишга тўғри келди, чунки янги қулаш хавфи бор эди. Зилзиладан зарар кўрган ҳудудлар аҳолиси узоқ вақт давомида ўз уйларига қайта олмаган, чунки бинолар авария ҳолатида қолган ва такрорий силкинишларда қулаб тушиши мумкин эди.
Фалокатдан кейинги дастлабки кунларданоқ Туркияга қутқарувчилар, шифокорлар ва инсонпарварлик юкларини юборган ўнлаб давлатлар ёрдам кўрсатди. Улар орасида ўзбекистонлик мутахассислар ҳам бўлган: улар вайроналар остидан одамларни қутқарган ва жабрланганларга тиббий ёрдам кўрсатган. Ўзбекистонликлар фожиа оқибатларини бартараф этишга ҳам ўз ҳиссаларини қўшдилар.
Орадан уч йил ўтиб, Туркия вайрон бўлган ҳудудларни тиклашда давом этмоқда, уй-жой ва ижтимоий объектларни барпо этмоқда. Ўзбекистон кўмагида уй-жойидан айрилган оилалар учун Хатай вилоятида барпо этилган "Ўзбекистон" турар жой мажмуаси тикланишнинг муҳим рамзи бўлди. Январь ойи охирида мажмуа Ўзбекистон президенти Шавкат Мирзиёев ва Туркия президенти Режеп Таййип Эрдоған иштирокида очилган эди.
Маросимда нутқ сўзлаган Шавкат Мирзиёев кўрсатилган ёрдам шунчаки инсонпарварлик ёрдами эмас, балки қардошлик ва самимий ҳамжиҳатлик ифодаси эканини таъкидлади. Унинг сўзларига кўра, ўзбек халқи оғир дамларда турк халқи ёнида бўлишга доим тайёр, қўшма лойиҳалар эса икки мамлакат ўртасидаги дўстлик ва ишончни мустаҳкамлашга хизмат қилади.
Бугун табиий офатдан энг кўп зарар кўрган Анқара, Истанбул, Хатай ва бошқа ҳудудларда "Сукунат марши" бўлиб ўтди: минглаб одамлар эрта тонгда байроқлар ва шамлар билан кўчаларга чиқиб, ҳалок бўлганлар хотирасига ҳурмат бажо келтирди. Соат 04:17 да - биринчи кучли силкиниш пайтида - 65 сония давом этган бир дақиқалик сукунат эълон қилинди, бу зилзила давомийлигини англатади. Бугун масжидларда жаноза намозлари, майдонларда мотам маросимлари бўлиб ўтмоқда.
Фожиа муносабати билан Туркия мактабларида энди ҳар йили хавфсизлик ва эвакуация дарслари ўтказилади.
Изоҳлар мавжуд емас