Ўзбекистон, Тошкент - Batafsil.uz. Трамп кутган, Мачадо олган Нобель мукофоти барибир Трампга буюрди. Венесуэла мухолифати етакчиси Мария Корина Мачадо пайшанба куни Оқ уйда АҚШ Президенти Дональд Трамп билан шахсий учрашув ўтказди ва ўзининг Нобель тинчлик мукофоти медалини унга тақдим этди. Трамп ушбу қадамни "ўзаро ҳурматнинг ажойиб ишораси" деб атаган.
Учрашув АҚШ кучлари Венесуэла президенти Николас Мадурони Каракасда қўлга олиб, гиёҳванд моддалар савдосида айблаганидан бир неча ҳафта ўтиб юз берди. Мачадо медалнинг топширилишини икки давлат ўртасидаги озодлик учун кураш биродарлиги рамзи эканини таъкидлаб, уни АҚШ президентининг "озодлик йўлидаги ноёб хизматлари эътирофи" деб атаган.
Бироқ, Нобель қўмитаси ўтган ҳафта махсус баёнот билан чиқиб, мукофот медали бошқа шахсга ўтиши мумкин бўлса-да, "Нобель лауреати" унвони бошқага ўтказилмаслиги, қайтариб олинмаслиги ёки тақсимланмаслигини билдирган.
Гарчи Трамп Мачадони "жасур аёл" деб атаган бўлса ҳам, ҳозирча уни Венесуэланинг янги раҳбари сифатида тан олишдан бош тортмоқда. АҚШ маъмурияти айни пайтда Мадуронинг собиқ вице-президенти Дельси Родригес билан ҳамкорлик қилмоқда. Трампнинг фикрича, Мачадо мамлакат ичида етарли даражада қўллаб-қувватловга эга эмас.
Шу билан бирга, АҚШ Венесуэла нефть секторини қайта тиклашга киришган.
Чоршанба куни 500 миллион долларлик илк нефть савдоси амалга оширилган. АҚШ кучлари санкция остидаги нефтни ташиётган олтинчи танкерни қўлга олган.
Яқин кунларда Вашингтонда Венесуэла элчихонасини қайта очиш бўйича музокаралар бошланиши кутилмоқда.
Эслатиб ўтамиз, аввалроқ Америка етакчиси Венесуэла мухолифати рамзига айланган Мария Корина Мачадога нисбатан муносабатини кескин ўзгартирди. Маълумотларга кўра, бунга Мачадонинг 2025 йилги Нобель тинчлик мукофотини қабул қилгани ва уни Трампга "топширмагани" сабаб бўлган.
Изоҳлар мавжуд емас