Ўзбекистон, Тошкент - Batafsil.uz. Мадагаскар ҳарбийлари мамлакат бошқарувини ўз қўлларига олганликларини эълон қилишди. Бу президент Андри Радзуэлинанинг оммавий норозилик ва тартибсизликлар ортидан мамлакатни тарк этганидан кўп ўтмай содир бўлди.
Полковник Майкл Рандрианиринанинг миллий радио орқали қилган мурожаатида маълум қилишича, бундан буён мамлакатни армия, жандармерия ва миллий полиция вакилларидан иборат Ҳарбий кенгаш бошқаради.
Ҳозирда парламентнинг қуйи палатасидан ташқари барча ҳокимият тармоқлари тарқатиб юборилган, Конституциянинг амал қилиши эса тўхтатилган. Бундан бироз олдин депутатлар президентни лавозимидан четлатиш учун овоз берган эди.
Унда ўн олти йил аввалги давлат тўнтаришидан кейин Радзуэлинанинг ҳокимиятга келишига ёрдам берган элита CAPSAT бўлинмаси жангчиларининг иштироки алоҳида эътиборни тортди.
Аввалроқ президент Мадагаскарни Франция ҳарбий самолётида тарк этгани маълум бўлганди. Кейинроқ у видеомурожаат билан чиқиб, истеъфога чиқиш нияти йўқлигини, бироқ ўз хавфсизлиги учун кетишга мажбур бўлганини айтган.
Изоҳлар мавжуд емас