Ўзбекистон, Тошкент - Batafsil.uz. Қозоғистон Бош вазири ўринбосари – Маданият ва ахборот вазири Аида Балаева ҳукумат мажлисида болалар ва ўсмирларнинг ижтимоий тармоқларга киришини чеклаш бўйича қонун лойиҳаси тайёрланганини маълум қилди.
Миллий қурултой аъзоларининг таклифлари асосида ишлаб чиқилган ушбу ҳужжат онлайн-платформалар ва оммавий ахборот воситалари тўғрисидаги қонунчиликка ўзгартиришлар киритишни назарда тутади. Янги тартиб экспертлар кўригидан ўтган ва тез орада жамоатчилик муҳокамасига қўйилади.
Эндиликда мамлакатда Рақамли ривожланиш ва Маориф вазирликлари билан ҳамкорликда фойдаланувчиларнинг ёшини аниқловчи махсус техник механизмлар ишлаб чиқилади.
Белгиланган ёш чегарасини бузганлик ёки унга риоя қилинишини таъминламаганлик учун маъмурий жавобгарлик чораларини белгилаш режалаштирилган.
Мазкур чоралар ОАВ соҳасидаги қонунчиликни тизимли ислоҳ қилишнинг бир қисми бўлиб, ёш авлодни интернетдаги зарарли контентдан ҳимоя қилишга қаратилган.
Аида Балаеванинг таъкидлашича, давлат раҳбарининг Миллий қурултойдаги топшириқларини ижро этиш доирасида жамият хавфсизлиги ва маънавий тарбия масалаларига устувор аҳамият берилмоқда.
Изоҳлар мавжуд емас