Ўзбекистон, Тошкент - Batafsil.uz. Россия раҳбарияти янги Дамашқ ҳукуматининг ҳокимиятдан ағдарилган диктатор Башар Асадни Сурияда ҳарбий иштирокини сақлаб қолиш эвазига судга топшириш учун экстрадиция қилиш тўғрисидаги сўровини рад этган. Бу ҳақда Batafsil.uz мухбири хабар бермоқда.
Эслатиб ўтамизки, Суриянинг собиқ президенти Башар Асад ўтган йилнинг декабрь ойида оиласи билан Россияга қочиб кетган эди. Январь ойидаёқ Суриянинг янги ҳукумати уни экстрадиция қилишни сўраб мурожаат қилганди. Рад жавобига қарамай, Сурия муваққат президенти аш-Шаръа ва унинг атрофидагилар Кремль билан музокараларни давом эттиришга тайёр.
"Россия БМТ Хавфсизлик кенгашининг доимий аъзоси. Суриядаги барча қуроллар Россияники. Сурия узоқ йиллар давомида таяниб келган кўплаб озиқ-овқат ва энергетика шартномалари мавжуд. Биз Сурия манфаатларини инобатга олишимиз керак", - дея ўз муносабатини изоҳлади аш-Шаръа.
Сурия янги раҳбарининг сўзларига кўра, ҳукумат Асадни қўллаб-қувватлаган Россия билан ҳам, "Ҳайъат Таҳрир аш-Шом" гуруҳи етакчиси сифатида Аш-Шаръани қўллаб-қувватлаган Туркия билан ҳам музокаралар олиб бормоқда.
"Туркиянинг Сурияда ҳарбий иштироки бор, Россиянинг ҳам ҳарбий иштироки мавжуд. Биз бошқа давлатлар билан Сурия бўйича аввалги келишувларни бекор қилдик ва янги келишувларни ишлаб чиқиш жараёнидамиз", - деб маълум қилган Суриянинг муваққат президенти.
Мутахассисларнинг фикрича, Суриянинг янги ҳукумати Асадни беришдан бош тортганига қарамай, Туркия таъсирини мувозанатга келтириш учун Россияга ўз ҳудудида ҳарбий иштирокини сақлаб қолишга рухсат бериши мумкин.
Аҳмад аш-Шаръанинг таъкидлашича, Москва кўп йиллардан бери Сурия армиясини таъминлаб келмоқда ва шу пайтгача бошқа давлатлардан Сурия қуролларини алмаштириш ва янгилаш бўйича таклифлар келиб тушмаган, улар асосан Россиядан келади.
Эслатиб ўтиш жоизки, Россия ва Суриянинг янги ҳукумати ўртасидаги биринчи расмий музокаралар январь ойи охирида, Россия ТИВ раҳбари ўринбосари Михаил Богданов бошчилигидаги делегация Дамашққа ташриф буюрганида бўлиб ўтган эди. Учрашув якунларига кўра, Сурия томони Дамашқ Москвадан ўтмишдаги хатоларни тан олиш, товон пули олиш ва Сурияни тиклашда ёрдам кутиши ҳақида баёнот берган.
Маълум бўлишича, 20 апрель куни Суриянинг Латакия портига Башар Асад режими қулаганидан кейин дон ортилган биринчи кема етиб келган. Дамашқда маълум қилинишича, Россия байроғи остида сузиб кетаётган "Пола Марина" кемаси бортида 6,6 минг тонна буғдой мавжуд.
Эслатиб ўтамиз, ўтган йилнинг декабрь ойида Суриянинг собиқ биринчи хоними Асма Асад турмуш ўртоғи билан ажрашмоқчи экани ва ўзи туғилиб, турмушга чиққунга қадар яшаган Лондонга қайтмоқчи экани хабар қилинганди.
Изоҳлар мавжуд емас