Ўзбекистон, Тошкент - Batafsil.uz. Reuters агентлигининг хабар беришича, Суданнинг ғарбий Дорфур ҳудудида жойлашган Ал-Фошир шаҳрида Rapid Support Forces (RSF) — яъни тезкор қўллаб-қувватлаш кучлари томонидан юзлаб фуқаролар ва ҳарбийлар отиб ўлдирилгани ҳақида гувоҳлар маълумот берган.
Гувоҳлардан бири — Алхейр Исмоилнинг сўзларига кўра, қўлларида қурол бўлмаган икки юзга яқин эркак отилган. Уларни RSF жангчилари туяларда айлантириб олиб келиб, ирқий камситувчи ҳақоратли сўзларидан сўнг сув омбори ёнида отишни бошлаган. Исмоил эса фақат тасодифан, уни таниб қолган собиқ синфдоши туфайли тирик қолган.
Бошқа гувоҳлар ва инсонпарварлик ташкилотлари вакиллари ҳам шаҳарни тарк этган аҳоли яқин атрофда тўплангани, эркаклар аёллардан ажратилгани ва кўпчилиги олиб кетилганини айтган. Бир неча манбалар отишмалар бўлганини тасдиқлаган.
RSF эса ушбу айбловларни рад этган ва уларни "душманлар томонидан ўйлаб топилган ёлғон" деб атаган. Улар ўз аскарларидан айримлари қонунбузарлик қилган бўлса, тергов олиб борилаётганини ва бир нечта шахслар қўлга олинганини билдирган.
Бироқ Reuters томонидан текширилган видеоларда RSF кийимидаги жангчилар қуролсиз одамларни отаётгани, шунингдек, ўлдирилган фуқароларнинг жасадлари кўриниши акс этган.
"Чегара билмас шифокорлар" (MSF) ташкилоти маълумотича, 26 октябрь куни 500 нафар фуқаро ва армия аскарлари шаҳарни тарк этишга уринган, аммо уларнинг кўпчилигини RSF қўлга киритган ёки ўлдирган. Тирик қолганлардан 5 миллиондан 30 миллион Судан фунтигача товон пули талаб қилинмоқда.
RSFнинг Ал-Фоширни қўлга киритиши Суданнинг аллақачон бўлинган ҳудудий ихтилофини янада чуқурлаштирди.
RSF раҳбари Муҳаммад Ҳамдан Дагало чиқишида фуқароларни ҳимоя қилишга чақирган ва асир олинганларни озод этишни буюрган. Шу билан бирга, у қонунбузарликлар учун жавобгарлар жазоланишини маълум қилган.
Ҳозирги кунда Ал-Фошир атрофида 260 мингга яқин киши бўлган, аммо уларнинг фақат 62 минг нафари бошқа ҳудудларда рўйхатга олинган, қолганлар тақдири номаълумлигича қолмоқда.
Изоҳлар мавжуд емас