Сулҳ тузиладими? Путин АҚШнинг ўт очишни тўхтатиш таклифига муносабат билдирди

Ўзбекистон, Тошкент - Batafsil.uz. Москва АҚШ ва Украинанинг 30 кунлик ўт очишни тўхтатиш таклифига ҳозирча аниқ жавоб қайтаргани йўқ. Россия президенти Владимир Путин сулҳ ғоясини умуман олганда қўллаб-қувватлашини айтди, бироқ бир қатор ҳал қилинмаган масалалар борлигини таъкидлади. Киевда бу гаплар манипуляция деб аталди, Вашингтон эса рад этилган тақдирда санкцияларни кучайтириш билан таҳдид қилди.

Музокаралар бошланишидан олдин ҳам Россия президенти ёрдамчиси Юрий Ушаков Россия вақтинчалик сулҳни қўллаб-қувватламаслигини билдириб, уни "Украина қўшинлари учун танаффус" деб атаганди. Россия ташқи ишлар вазири Сергей Лавров эса Кремль қисқа муддатли келишувлардан эмас, балки мустаҳкам тинчликдан манфаатдор эканини таъкидлади.

Путиннинг ўзи ҳам вақтинчалик сулҳ тузиш таклифига изоҳ бериб ўтди. 13 март куни Александр Лукашенко билан бўлиб ўтган матбуот анжуманида у умуман олганда ўт очишни тўхтатиш ғоясини қўллаб-қувватлашини айтди, аммо бу ерда "нюанслар" принципиал аҳамиятга эга эканлигини таъкидлади. Унинг сўзларига кўра, бундай сулҳлар ўтмишда Украина армиясини қайта гуруҳлаш учун фойдаланилган. Бундан ташқари, тинчлик жараёнининг ўзи Москванинг манфаатларини, жумладан, Россиянинг янги ҳудудлари учун хавфсизлик кафолатларини ҳисобга олиши керак.

Владимир Зеленский Путиннинг баёнотига муносабат билдириб, уни олдиндан айтиб бўладиган ва манипулятив деб атади. У Москвани жараённи пайсалга солишда айблади ва Киев тезкор ҳаракат қилишга тайёрлигини маълум қилди.

Доналд Трамп эса, аксинча, Кремль таклифни қабул қилишига умид билдирди, бироқ рад жавоби берилган тақдирда АҚШ санкцияларни кучайтиришга тайёрлиги ҳақида огоҳлантирди.

"Мен Россия учун жуда зарарли бўлган молиявий босимни қўллашим мумкин. Аммо мен буни қилмоқчи эмасман, чунки тинчликка эришмоқчиман," - деди у.

Энди Путин ва Трампнинг телефон орқали мулоқоти кутилмоқда, бу Москванинг нуқтаи назарига ойдинлик киритиши мумкин.

Эслатиб ўтамиз, яқинда АҚШ-Украина музокаралари бўлиб ўтди, унда Киев 30 кунлик ҳарбий ҳаракатларни тўхтатишга розилик билдирди. Шу билан бирга, АҚШ Давлат котиби Марко Рубионинг сўзларига кўра, энди тинчлик музокаралари бўйича "тўп" "Россия томонида".