Ўзбекистон, Тошкент – Batafsil.uz. АҚШ президенти Дональд Трамп 12 феврал куни Россия президенти Владимир Путин билан телефон орқали музокаралар ўтказган. Суҳбат тахминан бир ярим соат давом этган ва асосий мавзу Россия ва Украина ўртасидаги қуролли можарони бартараф этиш масаласи бўлган. Шу заҳоти АҚШ президенти Украина раҳбари Владимир Зеленский билан ҳам телефон орқали гаплашиб олган. Бу ҳақда мухбиримиз хабар бермоқда.
Кремль берган маълумотга кўра, Трамп ҳарбий ҳаракатларни тезроқ тўхтатиш ва тинч йўл билан ечим топиш тарафдори эканлигини билдирган. Путин эса ўз ўрнида можаронинг илк сабабларини бартараф этиш муҳимлигини таъкидлаган ва узоқ муддатли тинчлик фақат музокаралар орқали мумкинлигини билдирган. Шунингдек, у АҚШ президентининг икки давлат ўртасида ҳамкорликни давом эттириш зарурлиги ҳақидаги фикрини қўллаб-қувватламоқда.
Трамп Truth Social ижтимоий тармоғида суҳбат тафсилотлари билан ўртоқлашган:
"Биз давлатларимиз кучли томонларини ва ҳамкорлигимиз катта фойда келтириши мумкинлигини муҳокама қилдик. Бироқ, аввало, биз ҳар иккимиз ҳам Россия ва Украина ўртасидаги урушни тўхтатиш зарурлигини тан олдик. Президент Путин ҳатто менинг жуда кучли сайловолди шиорим — “Соғлом фикр”дан фойдаланди. Биз иккимиз ҳам бунга қатъий ишонамиз.
Биз биргаликда иш олиб боришга келишиб олдик, шу жумладан, ўзаро ташрифлар уюштириш ҳақида ҳам гаплашдик. Шунингдек, жамоаларимизга музокараларни ташкил қилиш бўйича ишни дарҳол бошлашни топширдик. Биринчи қадам — Украина президенти Владимир Зеленскийни бизнинг суҳбатимиз ҳақида хабардор қилиш бўлди - бу билан ўзим дарҳол шуғулланаман".
Суҳбат натижаларига кўра, раҳбарлар шахсий алоқаларни қўллаб-қувватлашга келишиб олишган, шунингдек, юзма-юз учрашув имкониятини муҳокама қилишган. Путин Трампни Москвага, жумладан, 9 май байрамида иштирок этиш учун таклиф қилган.
Путин билан суҳбатдан сўнг, Трамп Украина президенти Владимир Зеленский билан телефон орқали музокаралар ўтказган. Украина президенти маслаҳатчиси Дмитрий Литвиннинг хабар беришича, суҳбат тахминан бир соат давом этган.
Зеленскийнинг таъкидлашича, Трамп уни Россия раҳбари билан бўлиб ўтган суҳбат тафсилотлари ҳақида батафсил хабардор қилган. Унинг сўзларига кўра, улар можарони тугатиш учун мумкин бўлган қадамларни кўриб чиқишган.
Трамп шунингдек, 14 феврал куни Мюнхенда учрашув бўлиб ўтишини ва унда Америка делегациясига АҚШ вице-президенти Джей Ди Вэнс ҳамда давлат котиби Марко Рубио бошчилик қилишини маълум қилган.
"Бу бемаъни урушни тугатиш вақти келди. У орқали кўплаб бехуда ўлимлар ва вайронагарчиликлар юз бермоқда. Россия ва Украина халқини Яратганнинг ўзи ҳимоя қилсин!" — деб ёзди Трамп Truth Socialда.
Оқ уй матбуот котиби Кэролайн Ливитт Трампнинг Путин ва Зеленский билан музокараларини "жуда ижобий" деб атаган. Бироқ у Европа давлатлари можарони ҳал қилиш бўйича келгуси мулоқотларда иштирок этиши ҳақида аниқ маълумот бермаган.
Изоҳлар мавжуд емас