Ўзбекистон, Тошкент - Batafsil.uz. Туркияда навбатдаги президентлик сайловларида Туркия етакчиси Ражаб Тойиб Эрдўғаннинг асосий рақиби сифатида кўрилаётган Истанбул мэри Экрем Имомўғлининг ҳибсга олиниши ортидан оммавий норозилик намойишлари бошланди. Бу ҳақда Batafsil.uz мухбири хабар бермоқда.
ВВС маълумотларига кўра, ҳибсга олиш Имомўғлининг 2028 йилда бўлиб ўтиши керак бўлган президентлик сайловларига Республика халқ партиясидан номзод сифатида кўрсатилишидан бир неча кун олдин содир бўлган. У билан бирга 100 дан ортиқ киши, жумладан, сиёсатчилар, журналистлар ва тадбиркорлар ушланган.
Сиёсий арбоб ҳибсга олинганидан сўнг, Истанбулда норозилик намойишлари бошланди. Минглаб одамлар кўчаларга чиқиб, Имомўғлини қўллаб-қувватловчи шиорлар айтиб, ҳукуматни танқид қилишди. Полиция намойишчиларни тарқатиш учун сув пуркагичлар ва кўздан ёш оқизувчи газ қўллади. Шунингдек, ҳукумат ижтимоий тармоқларга киришни чеклаб қўйди.
Намойишчилар Имомўғли сақланаётган мэрия биноси, полиция бўлими, Истанбул университети ҳудуди ва бошқа жойлар яқинида йиғилган.
Истанбул университети талабалари таълим муассасасининг Имомўғлининг олий маълумот тўғрисидаги дипломини бекор қилиш қарорига норозилик билдиришди. Қарор сиёсатчи ҳибсга олинишидан бироз олдин қабул қилинган. Олий маълумоти йўқлиги унинг президентликка расман номзод бўлишига имкон бермайди.
Жаҳон ҳамжамияти, жумладан, Германия ва Европа комиссияси ҳибсга олишни қоралаб, уни сиёсий сабабларга кўра амалга оширилган деб атади.
Мэрнинг рафиқаси Дилек Имомўғли унинг ҳибсга олинишини "Туркиянинг бўлажак президентини йўқ қилишга қаратилган мақсадли сиёсий операция", - деб атади.
"Бу миллатга тўғридан-тўғри зарба ва биз курашамиз," - деди у.
Туркия адлия вазири Йилмаз Тунч шаҳар мерини сиёсий таъқиб қилиш ҳақидаги айбловларни рад этди ва президент Ражаб Тоййиб Эрдўғонни мухолифатга қарши репрессиялар ва ҳибсга олишлар билан боғлаётганларни танқид қилди.
Сиёсий беқарорлик фонида турк лираси 12 фоизга қадрсизланиб, рекорд даражага етди. Бундан ташқари, Туркиянинг Borsa Istanbul 100 биржасининг базавий индекси 6,9 фоизга тушиб кетди, шундан сўнг савдолар тўхтатилди.
Кейинчалик лира ва BОSТ 100 курслари бироз тикланди, аммо аввалги кўрсаткичларга етмади. Bloomberg маълумотларига кўра, маҳаллий инвесторлар турк компаниялари акцияларининг тахминан 62,5 фоизига эгалик қилади, шунинг учун бозор Истанбул мерининг ҳибсга олиниши каби ички янгиликларга жуда сезгир.
Имомўғли ҳибсга олинганидан кейин норозилик намойишлари Анқара ва Туркиянинг бошқа шаҳарларида ҳам бўлиб ўтди. Якшанба куни бутун мамлакат бўйлаб кенг кўламли норозилик намойишлари ўтказилиши кутилмоқда.
Эслатиб ўтамиз, Истанбул мэри Экрем Имомўғли 19 март куни қўлга олинган эди. Қўлга олишнинг расмий сабаби сифатида ҳокимият ваколатларини суиистеъмол қилиш ва муниципал тендерларни ўтказишдаги қоидабузарликлар келтирилган.
Изоҳлар мавжуд емас