Ўзбекистон, Тошкент - Batafsil.uz. Ўзбекистон Марказий банки тижорат банклари ва микромолия ташкилотларида пул ўтказмалари бўйича назоратни кучайтиришга қаратилган янги талабларни жорий этиш лойиҳасини ишлаб чиқди. Мазкур ўзгартиришлар жиноий даромадларни легаллаштириш ва терроризмни молиялаштиришга қарши курашиш бўйича халқаро FATF тавсиялари асосида тайёрланган.
Янги тартибга кўра, 25 базавий ҳисоблаш миқдоридан (10,3 миллион сўм) юқори бўлган пул ўтказмалари бўйича жўнатувчи ва қабул қилувчи ҳақида батафсил маълумотлар тақдим этиш мажбурий этиб белгиланади. Хусусан, жисмоний шахслар учун яшаш манзили, туғилган санаси ва ПИНФЛ рақами, юридик шахслар учун эса СТИР (ИНН) маълумотлари талаб этилади. Шунингдек, қабул қилувчининг жойлашуви — шаҳар ёки мамлакат кўрсатилиши шарт бўлади.
Таклиф этилаётган тизим пул ўтказмаларини жўнатувчидан қабул қилувчигача тўлиқ кузатиб боришни назарда тутади. Бунинг учун махсус ҳисоб рақами ёки операция идентификаторидан фойдаланилади. Карта орқали амалга ошириладиган тўловларда ҳам карта рақамининг тўлиқ кузатилиши таъминланади. Халқаро нақд пул ечиш операциялари бўйича эса банклар мижоз ҳақидаги маълумотларни 3 иш куни ичида тақдим этиши лозим бўлади.
Қайд этилишича, 25 БҲМдан кам бўлган ўтказмалар учун соддалаштирилган талаблар сақланиб қолади. Бунда фақат жўнатувчи ва қабул қилувчининг номи ҳамда операция идентификаторини кўрсатиш кифоя қилади. Мазкур лойиҳа бўйича жамоатчилик муҳокамаси жорий йилнинг 4 апрелига қадар давом этади.
Олдинроқ Марказий банк, Солиқ қўмитаси ва Адлия вазирлиги вакиллари Тошкентда бўлиб ўтган оммавий учрашувда нақд пулсиз тўловларга ўтишнинг кучайтирилиши сабабларини батафсил тушунтириб, 1 апрелдан кучга кирадиган чекловлар рўйхатини тақдим этганди. Мухбиримиз иштирок этган тадбирда вазирлик мутахассислари мамлакат молия тизимида янги қоидаларни қўллаш тартиби ҳақидаги саволларга жавоб беришган эди.
Изоҳлар мавжуд емас