Ўзбекистон, Тошкент - Batafsil.uz. Жаҳон криптовалюта бозори сўнгги йиллардаги энг кескин пасайишлардан бирини бошдан кечирмоқда. Бунга АҚШ президенти Дональд Трампнинг Хитойдан импортга 100 фоизлик бож жорий этиш ниятида эканлиги ҳақидаги баёноти сабаб бўлди. АҚШ фонд бозори 1,65 триллион доллар, крипто бозори эса 10 миллиард доллар миқдорида зарар кўрди ва бу тарихдаги рекорд кўрсаткич бўлди.
Трампнинг янги савдо чоралари Пекиннинг камёб ер элементлари устидан экспорт назоратини кучайтиришига жавоб бўлди. 9 октябрь куни ХХР Тижорат вазирлиги нодир металлар экспортига қўшимча чекловлар жорий этилишини эълон қилди.
Идоранинг таъкидлашича, ноёб ер металларини қазиб олиш, эритиш ва ажратиш, магнит материалларини ишлаб чиқариш, шунингдек, таркибида ноёб ер элементлари бўлган иккиламчи ресурсларни қайта ишлаш ва утилизация қилиш билан боғлиқ технологиялар ва уларнинг ташувчиларини тегишли рухсатномасиз экспорт қилишга йўл қўйилмайди.
Бундан ташқари, Хитой Американинг Qualcomm технологик компаниясига нисбатан монополияга қарши тергов бошлади. Корпорация АҚШда жойлашган бўлса-да, унинг тижорат фаолиятининг катта қисми Хитой бозорига тўғри келади.
Бунинг ортидан Трамп Вашингтон 1 ноябрдан ёки ундан олдинроқ Хитойдан келадиган маҳсулотларга нисбатан божларни 100 фоизга оширишини, шунингдек, дастурий таъминотга экспорт назорати чораларини жорий этишини айтди.
Шундай қилиб, АҚШнинг ХХР маҳсулотларига умумий тарифлари 130 фоизга етиши мумкин. Дональд Трампнинг сўзларига кўра, бу Пекиннинг "ўта тажовузкор позицияси"га жавоб бўлади.
АҚШ президентининг баёнотидан сўнг бир сутка ичида биткоин 14 фоиздан кўпроққа арзонлашиб, 112 минг доллардан пастга тушди, эфир бир кун аввалги 4,4 минг долларга нисбатан 3,4 минг долларни ташкил этди ва бир қатор алткоинлар 50-60 фоизга қулади.
Пасайиш барча соҳаларга: саноат, АТ, молияга таъсир кўрсатди. АҚШ фонд бозори 1,65 триллион доллар, крипто бозори эса 10 миллиард доллар йўқотди, бу тарихдаги рекорд саналади.
Хитой Савдо вазирлиги Хитой расмийлари қатъий жавоб чораларини кўришини маълум қилди. Пекин Вашингтонни келишмовчиликларни мулоқот орқали ҳал қилишга чақирди ва агар АҚШ нотўғри йўлдан боришда давом этса, ўзининг қонуний ҳуқуқ ва манфаатларини ҳимоя қилиш учун қатъий чоралар кўришига ишонтирди.
Кейинроқ Дональд Трамп Хитой билан янги савдо можаросидан хавотирланмасликка чақирди.
"Хитойдан хавотир олманг, ҳаммаси яхши бўлади! ХХР раиси Си Цзинпинь ўз мамлакати учун иқтисодий депрессияни истамайди, мен ҳам. АҚШ Хитойга зарар етказишни эмас, балки унга ёрдам беришни истайди", - деб ёзган Америка президенти ўзининг ижтимоий тармоғида.
Изоҳлар мавжуд емас