Ўзбекистон, Тошкент - Batafsil.uz. Кеча, 29 март куни, Бош вазир ўринбосари Жамшид Хўжаев тадбиркорлар билан ўтказилган очиқ мулоқотда 15 турдаги маҳсулотни ишлаб чиқариш учун зарур бўлган хомашё импортига божхона божлари бекор қилинишини маълум қилди. Ушбу чора айрим тайёр маҳсулотлар импорти учун бож паст, аммо унинг хомашёси учун юқори бўлган "тариф инверсияси" ҳолатини бартараф этишга қаратилган.
Янги тартибга кўра, ишлаб чиқарувчилар хомашёни олиб киришда божхона божи ва ҚҚС тўламайдилар (ҚҚС фақат тайёр маҳсулот ички бозорда сотилганда тўланади). Имтиёз бериладиган товарлар рўйхатига электроскутерлар, ногиронлик аравачалари, кунгабоқар ёғи, шоколад, болалар озуқаси ва қандолат маҳсулотлари каби 15 та йўналиш киритилган. Дастлаб бу рўйхат кенгроқ бўлган, бироқ маҳаллий ишлаб чиқарувчиларнинг ички бозордаги манфаатларини ҳимоя қилиш мақсадида қайта кўриб чиқилган.
Бу қарор маҳаллий корхоналарга ишлаб чиқариш таннархини пасайтириш ва импорт маҳсулотлари билан тенг шароитда рақобатлашиш имконини беради. Тадбиркорлар томонидан ижобий кутиб олинган ушбу ўзгаришлар Президентнинг 2025 йил 17 декабрдаги фармони ижроси доирасида амалга оширилмоқда. Жамшид Хўжаевнинг сўзларига кўра, эндиликда хомашё қаердан сотиб олинишидан қатъи назар, божхона тарифи ноль ставкада белгиланади.
Эслатиб ўтамиз, аввалроқ мамлакатда чет эл фуқаролари учун қўшилган қиймат солиғини қайтаришнинг янгиланган тизими ишга туширилиши режалаштирилганди. Босқичма-босқич Tax Free нафақат аэропортларда, балки божхона постлари ва чакана савдо дўконларида ҳам мавжуд бўлиши маълум қилинган эди.
Изоҳлар мавжуд емас