Ўзбекистоннинг олтин-валюта захиралари йил бошидан қарийб 9 миллиард долларга етди

Ўзбекистон, Тошкент - Batafsil.uz. Ўзбекистоннинг олтин-валюта захиралари 1 сентябрь ҳолатига кўра 50,087 миллиард долларга етди.

Марказий банк ҳисоботидан маълум бўлишича, август ойига нисбатан захиралар ҳажми 1,34 млрд долларга ёки 2,76 фоизга ошган. Йил бошидан буён ўсиш 8,9 миллиард долларни ташкил этди.

Захираларнинг асосий қисмини олтин ташкил этади - 40,06 миллиард долларлик 11,8 миллион троя унцияси. Саккиз ой ичида олтин захираларининг қиймати 8 миллиард долларга ошди, аммо ҳажми 0,5 миллион унцияга камайди.

Валюта захиралари 9,4 миллиард долларгача камайди. Шундан 908,9 миллион доллари бошқа марказий банклар ва Халқаро валюта жамғармасидаги ҳисобварақларда, 7,5 миллиард доллари эса хорижий банкларга жойлаштирилган.

Бундан ташқари, қимматли қоғозлар ҳажми 4,2 миллион долларга ошиб, 1,016 миллиард долларга етди.

Эслатиб ўтамиз, Ўзбекистонда олтин нархи қимматлашишда давом этмоқда. Энди 100 граммлик қуйма учун 145,5 миллион сўм тўлашга тўғри келади, бу янги рекорд бўлди.