Ўзбекистон, Тошкент - Batafsil.uz. Эроннинг Ўзбекистондаги элчиси Муҳаммад Али Искандарий ОАВ вакиллари билан учрашувда Яқин Шарқдаги қонли тўқнашувларнинг асосий сабабларидан бири сифатида Исроил Бош вазири Бенямин Нетаньяхунинг коррупция ботқоғига ботгани ва қамоқдан қочиш истагини кўрсатди. Дипломатнинг сўзларига кўра, шахсий манфаатлар глобал хавфсизликдан устун қўйилмоқда.
Элчининг таъкидлашича, Нетаньяху ўз бошидаги коррупция билан боғлиқ муаммолар ва қамоққа тушиш хавфи туфайли урушни атайлаб чўзмоқда. "Уруш тўхташи билан Нетаньяху коррупция бўйича суд олдида жавоб беришига тўғри келади. Шу сабабли, у ўз ҳокимиятини сақлаб қолиш учун минтақани олов ичида тутишга мажбур", — деди Искандарий.
Шунингдек, элчи АҚШнинг янги маъмурияти атрофидаги шахсларни ҳам коррупциялашган тизимнинг бир қисми сифатида танқид қилди. Унинг фикрича, Вашингтондаги айрим сиёсий доиралар ва қурол-яроғ лоббилари урушдан улкан фойда кўрмоқда. Трамп жамоасининг минтақага нисбатан ёндашуви тинчликка эмас, балки вазиятни янада кескинлаштириш орқали маълум гуруҳларнинг манфаатларини таъминлашга хизмат қилиши мумкинлиги таъкидланди.
Дипломат коррупциялашган сиёсий етакчиларнинг хатти-ҳаракатлари халқаро ҳуқуқ нормаларини йўққа чиқараётганини қайд этди. БМТ низоми ва инсон ҳуқуқларининг бузилиши айнан шундай шахсий амбициялар қурбони бўлаётгани билдирилди.
Эрон томонининг позициясига кўра, минтақада барқарорлик ўрнатилиши учун биринчи навбатда агрессия ва коррупцияга асосланган сиёсий ўйинларга чек қўйилиши, халқаро ҳамжамият эса бундай адолатсизликка нисбатан қатъий ҳуқуқий баҳо бериши лозим.
Изоҳлар мавжуд емас