Ўзбекистон, Тошкент - Batafsil.uz. 1999 йилнинг 16 февраль куни Тошкент шаҳрининг бир нечта нуқталарида содир этилган террористик актларга бугун 27 йил тўлди. Архивдан олинган материал ўша кунлардаги фожеанинг кўлами ва мутасаддиларнинг иродасини кўрсатмоқда.
Ўзбекистон тарихига мудҳиш саҳифа бўлиб кирган ушбу воқеалар давомида асосий нишон Вазирлар Маҳкамаси биноси ва шахсан Президент Ислом Каримов бўлган. Портлашлар мамлакат раҳбари иштирокида ўтказилиши керак бўлган ҳукумат мажлиси бошланиши арафасида амалга оширилган бўлиб, илк портлаш соат тахминан 10:00 атрофида ҳукумат биноси яқинида содир этилган. Гувоҳлар ва собиқ мутасаддиларнинг эслашича, воқеа жойида кучли отишмалар юз берган, ҳатто Президентнинг хизмат автомобили бинога 10 метр қолганда портлаш оқибатида йўналишини ўзгартиришга мажбур бўлган.
Фожиали кунда бир нечта стратегик нуқталарда қўпорувчилик ҳаракатлари давом этаётган бир пайтда, ички ишлар, хавфсизлик хизмати ва ёнғин ўчириш бўлинмалари зудлик билан воқеа жойларига етиб борган. Қутқарув ишлари давомида кўплаб соҳа ходимлари жароҳатланган, бироқ улар ўз хизмат бурчларини бажаришда давом этганлар.
Ўша вақтдаги давлат раҳбари хавфсиз жойга ўтиш ҳақидаги таклифларни кескин рад этиб, воқеа жойининг ўзидаёқ халққа мурожаат қилган ва бу ҳаракатларни нафақат шахсига, балки бутун ўзбек халқи ва мустақилликка қарши қаратилган тажовуз деб баҳолаган.
Террорчиларнинг мақсади мамлакатда ваҳима ва беқарорлик келтириб чиқариш бўлган бўлса-да, ўша куни соат 13:00 да Олий Мажлис биносида режалаштирилган йиллик мажлис барибир ўтказилган.
Ушбу террорчилик хуружи оқибатида кўплаб бегуноҳ ватандошларимиз ҳалок бўлган ва юзлаб инсонлар турли даражадаги тан жароҳатлари олган. Мазкур воқеалар Ўзбекистонда хавфсизлик тизимини тубдан қайта кўриб чиқиш ва тинчликни асраш борасидаги давлат сиёсатининг қатъийлашишига асосий туртки бўлган.
Эслатиб ўтамиз, ушбу воқеалар расмий тахминларга кўра, 16 кишининг ҳаётига зомин бўлган, қарийб 150 киши яраланган.
Изоҳлар мавжуд емас