Ўзбекистон, Тошкент - Batafsil.uz. Рақобат қўмитаси Махсус комиссияси томонидан пропан импорти билан шуғулланувчи 31 та хўжалик юритувчи субъектга нисбатан қўзғатилган иш якунланиб, қонунбузарларга нисбатан қатъий санкциялар белгиланди. Ўтказилган суриштирувлар натижасида ушбу корхоналар 2025 йилнинг ноябрь-декабрь ойлари ва жорий йилнинг январь ойида биржа савдоларида пропан нархини асоссиз ошириш ҳамда маҳсулот ҳажмларини сунъий равишда сотувга чиқармаслик орқали бозордаги вазиятни издан чиқаргани аниқланди.
Назорат тадбирлари давомида 12 та субъект, жумладан, SHIRIN GAZ SERVIS, GAZONE, GTL GAZ ва бошқа бир қатор МЧЖлар ўзаро тил бириктириб, биржа савдоларида рақобатга зид бўлган мувофиқлаштирилган ҳаракатларни амалга оширгани маълум бўлган. Қолган корхоналар эса бошланғич нархларни асоссиз кўтариш ва маҳсулотни амалдаги қонунчиликка зид равишда тўғридан-тўғри шартномалар асосида сотиш орқали иқтисодий манфаат кўришга интилган. Ушбу ҳолатлар "Рақобат тўғрисида"ги Қонун талабларини қўпол равишда бузиш деб эътироф этилган.
Юқоридаги қонунбузилиш ҳолатлари учун Махсус комиссия қарори билан 31 та субъектга нисбатан жами 28,9 миллиард сўм миқдорида молиявий жарима қўлланилган. Шунингдек, асоссиз равишда қўлга киритилган 34,1 миллиард сўм миқдоридаги маблағни республика бюджетига қайтариш бўйича қатъий талаб қўйилган. Қўмита томонидан кўрилган тезкор чоралар ва бозорга таъсир ўтказиш натижасида биржада пропан нархининг 21 фоизгача арзонлашишига эришилган.
Январь ойида Ўзбекистон биржа савдоларида пропан нархини барқарорлаштириш бўйича кўрилган тезкор чоралар натижасида ўртача нархлар тоннасига 9,3 миллион сўмдан 7,8 миллион сўмгача тушганди. Ўшанда ҳам Рақобат қўмитаси нархларни сунъий оширган ўнлаб тадбиркорлик субъектларига нисбатан чора кўрган эди.
Изоҳлар мавжуд емас