Ўзбекистон, Тошкент - Batafsil.uz. Ханти-Мансийск автоном округи - Юграда Россияда бўлиш режимини бузгани учун 150 дан ортиқ чет эл фуқаролари чиқариб юборилди, уларнинг аксарияти Ўзбекистон ва Тожикистондан борган.
Минтақавий ИИВ матбуот хизматининг хабар беришича, Россия президентининг муҳожирлар учун вақтинчалик енгилликларни назарда тутувчи 1126-сонли фармони тугаганидан сўнг, минтақанинг миграция хизматлари мажбурий чиқариб юбориш амалиётини қайта тиклади. Вазирлик маълумотларига кўра, айни пайтда Сургутдаги Хорижий фуқароларни вақтинча сақлаш марказида 180 га яқин киши бўлиб, уларга нисбатан депортация тўғрисида қарор қабул қилинган.
Чиқариб юборишдан олдин мигрантлар мажбурий дактилоскопик рўйхатдан ўтказилади, шундан сўнг уларга Россияга кириш тақиқланади. Биргина Сургутда сентябрь ойи охирида депортация қилинишини кутаётган 77 нафар ноқонуний муҳожир сақланмоқда.
Йил бошидан буён Сургут ИИБ ходимлари уч мингга яқин миграция қонунчилиги бузилишини аниқлаган. Матбуот хизматининг маълум қилишича, Федерал суд ижрочилари хизмати бошқармаси билан ҳамкорликда мунтазам равишда округ ҳудудида қонунни бузган ҳолда бўлиб турган хорижликларни аниқлаш ва чиқариб юбориш бўйича рейдлар ўтказилмоқда.
Шу билан бирга, ИИВ маълумотларига кўра, 2025 йилнинг дастлабки етти ойида чет эл фуқаролари ўртасидаги жиноятчилик даражаси 25 фоизга камайган.
Таъкидлаш жоизки, 2024 йил декабрь ойида Югра губернатори Руслан Кухарук патент асосида ишлайдиган чет эллик ишчилар учун ёпиқ бўлган соҳалар рўйхатини кенгайтириш тўғрисидаги қарорни имзолаган эди. Иқтисодий фаолиятнинг тақиқланган саккизта турига яна ўн тўрттаси қўшилди.
Эслатиб ўтамиз, Ханти-Мансийск автоном округи Думаси депутати Таги-заде Холид Боюкага ўғли парламент йиғилишида Сибирга "ўзбекларнинг тарихий ватани" сифатида қараш мумкинлигини айтган эди. Бу сўзлари учун у кечирим сўрашга, шунингдек, маошидан маҳрум бўлишга мажбур бўлди. Июль ойида у депутатлик мандатидан воз кечишга қарор қилгани маълум бўлди.
Изоҳлар мавжуд емас