Ўзбекистон, Тошкент - Batafsil.uz. Тошкент шаҳрида 30 март куни бир эркак Олий суд биноси ёнидаги дарахтга чиқиб, олти йил олдинги суд ҳукмидан норозилигини билдирди. Олий суд матбуот хизмати мазкур ҳолат юзасидан расмий маълумот берди.
Воқеа жойига етиб келган масъуллар фуқарони хавфсиз тарзда пастга туширишга муваффақ бўлишган. Тиббий кўрикдан сўнг унга ҳеч қандай жароҳат етмагани аниқланган.
Аниқланишича, Тошкент вилоятида истиқомат қилувчи ушбу фуқаро 2020 йилда содир этган жиноятлари учун айбдор деб топилган. У жуда кўп миқдорда ўзганинг мулкини ўзлаштириш ёки растрата қилиш моддаси бўйича 7 йил муддатга озодликдан маҳрум этилган. Гарчи фуқаро солиқ тўлашдан бўйин товлаш айблови бўйича оқланган бўлса-да, асосий жазо ҳукми ўз кучида қолган.
Мазкур шахс ўтган йилнинг ноябрь ойида Олий суд раҳбарияти қабулида бўлган ва унга ҳукмни ўзгартириш учун қонуний асослар етарли эмаслиги тушунтирилган. Бироқ фуқаро бу қарорга рози бўлмай, экстремал усулда норозилик билдиришга қарор қилган.
Дарахтдан туширилганидан сўнг, Олий суд раиси Бахтиёр Исломов фуқарони шахсан қайта қабул қилган ва унинг шикоятини тегишли тартибда кўриб чиқиш учун расмийлаштирган. Суд идораси ўз манфаатларини ҳимоя қилиш ҳуқуқи қонун билан кафолатланганини ва бунинг учун ҳаётга хавф солувчи ҳаракатларни амалга оширишга ҳожат йўқлигини таъкидлаган.
Изоҳлар мавжуд емас