Ўзбекистон, Тошкент - Batafsil.uz. Олий Мажлис депутатлари аҳолини зарарли шовқиндан ҳимоя қилиш тўғрисидаги қонун лойиҳасини қабул қилиб, Сенатга юборди. Маълум бўлишича, аҳолининг тинчлиги ва дам олиш соатларида белгиланган тартибни бузганлик учун жавобгарлик кучайтирилади.
Эслатиб ўтамиз, лойиҳада фуқароларнинг тинчлигини бузишга йўл қўйилмайдиган вақтни узайтириш кўзда тутилган. Энди сукунат сақланиши керак:
иш кунлари - соат 23:00 дан 07:00 гача (аввалги соат 23:00 дан 06:00 гача бўлган давр ўрнига);
дам олиш ва байрам кунлари - соат 22:00 дан 09:00 гача.
Кўп қаватли уйларда шовқин даражаси рухсат этилган меъёрдан юқори бўлган қурилиш ва таъмирлаш ишларини фақат иш кунлари соат 09:00 дан 18:00 гача амалга оширишга рухсат берилади.
Шунингдек, ушбу соатларда аҳолининг тинчлиги ва дам олишини бузганлик учун маъмурий жавобгарлик кучайтирилмоқда:
шовқиннинг зарарли таъсири натижасида етказилган зарар суд тартибида қопланади;
компенсация тўланганлиги қоидабузарларни шовқин манбаини бартараф этишдан озод этмайди;
шовқин даражаси йўл қўйиладиган даражадан юқори бўлган ишлаб чиқаришларда банд бўлган ходимларга меҳнат тўғрисидаги қонун ҳужжатларига мувофиқ оширилган иш ҳақи тўланади;
сукунат меъёрларини мунтазам равишда бузадиган объектлар вақтинча тўхтатилиши мумкин.
Депутатларнинг таъкидлашича, қонуннинг қабул қилиниши мамлакатда шовқин хавфсизлиги бўйича аниқ стандартларни шакллантириш, фуқароларнинг тинч ва соғлом яшаш муҳитига бўлган ҳуқуқини таъминлаш имконини беради.
Изоҳлар мавжуд емас