Ўзбекистон, Тошкент - Batafsil.uz. Ўзбекистонда сунъий интеллект соҳасида энг яхши натижа кўрсатган мактаблар электромобиллар билан рағбатлантирилади. Тегишли чора-тадбирлар Вазирлар Маҳкамасининг 2025 йил 31 декабрдаги ёшларни IT соҳасига жалб қилиш ва рақамли кўникмаларни ривожлантиришга қаратилган қарорида назарда тутилган (қарор нусхаси таҳририят да мавжуд).
Ҳужжатга кўра, мамлакатда "Бир миллион дастурчи" ташаббусининг мантиқий давоми бўлган "Сунъий интеллект соҳасида беш миллион етакчи" лойиҳаси амалга оширилади. Лойиҳа Рақамли технологиялар вазирлиги томонидан Мактабгача ва мактаб таълими вазирлиги ҳамда Олий таълим, фан ва инновациялар вазирлиги билан ҳамкорликда амалга оширилмоқда.
Ташаббус доирасида нафақат ёшларни сунъий интеллект технологиялари билан ишлаш кўникмаларига оммавий ўқитиш, балки энг юқори натижаларга эришган иштирокчилар, педагоглар ва таълим муассасаларини тизимли равишда рағбатлантириш ҳам режалаштирилган. Бунинг учун ҳар йили миллий танлов ўтказилади ва унинг натижаларига кўра лойиҳанинг энг яхши иштирокчилари аниқланади.
Танлов ғолиблари пул мукофотлари ва қимматбаҳо совғалар билан тақдирланади. Жумладан, 100 нафар ўқитувчига 1 минг доллар эквивалентида пул мукофоти, яна 10 нафарига хорижга туристик йўлланма берилади. Ёшлар учун 500 та ноутбук ва 500 та қимматбаҳо совғалар ажратилган.
Бундан ташқари, учта олий таълим муассасаси пул мукофоти билан тақдирланади, сунъий интеллект соҳасида энг яхши натижа кўрсатган иккита умумтаълим мактаби эса "Президент совғаси" доирасида электромобиль билан мукофотланади.
Эслатиб ўтамизки, Ўзбекистонда боғча ва мактаб педагог ходимларининг ўртача иш ҳақини босқичма-босқич икки баробарга ошириш режалаштирилган. Тегишли норма жамоатчилик муҳокамаси учун эълон қилинган президент фармони лойиҳасида назарда тутилган.
Изоҳлар мавжуд емас