Ўзбекистон, Тошкент - Batafsil.uz. 2025 йил давомида хорижий давлатлардан Ўзбекистонга доимий яшаш мақсадида 1 159 нафар киши кўчиб келган бўлиб, уларнинг асосий қисми Тошкент шаҳри ва Тошкент вилоятига тўғри келади.
Миллий статистика қўмитаси маълумотларига кўра, мамлакатга кўчиб келувчиларнинг салмоқли қисми Россия Федерацияси (39,9 фоиз) ва Қозоғистон (20,3 фоиз) ҳиссасига тўғри келмоқда. Шунингдек, кўчиб келганларнинг 10,3 фоизи Тожикистон, 4,3 фоизи Қирғизистон ва 3,1 фоизи Туркманистон фуқароларидир. Қолган 22,1 фоизлик улуш эса бошқа давлатлар вакиллари томонидан шаклланган.
Ҳудудий тақсимот бўйича пойтахт Тошкент шаҳри хорижликлар энг кўп кўчиб келган ҳудуд бўлиб турибди — 698 нафар. Тошкент вилоятига 275 киши, Қорақалпоғистон Республикасига эса 101 киши доимий яшаш учун келган.
Республиканинг қолган ҳудудларида кўрсаткичлар сезиларли даражада паст. Хусусан, Сирдарё вилоятига 24 нафар, Фарғонага 14 нафар, Жиззах ва Навоий вилоятларига 12 нафардан киши кўчиб ўтган. Рўйхатнинг қуйи поғоналарида Бухоро (11 нафар), Хоразм (7 нафар), Қашқадарё ва Самарқанд (2 нафардан) ҳамда Наманган вилояти (1 нафар) жой олган. Маълумотлар кўчиб келувчилар асосан иқтисодий ва маъмурий марказларни афзал кўраётганини кўрсатади.
Аввалроқ қўмита 2026 йил 1 январь ҳолатига кўра мамлакатнинг асосий демографик кўрсаткичларини эълон қилганди. Унга кўра, аҳоли сони сезиларли даражада ўсиб, эркаклар сони аёллар сонига нисбатан кўпроқни ташкил этган эди.
Изоҳлар мавжуд емас