Ўзбекистон, Тошкент - Batafsil.uz. АҚШ Президенти Дональд Трамп Шавкат Мирзиёев ва Қосим-Жомарт Тоқаев билан телефон орқали мулоқот қилиб, уларни келгуси йили Маямида бўлиб ўтадиган G20 саммитига меҳмон сифатида таклиф этишини маълум қилди.
Дональд Трамп ўзининг Truth Social платформасидаги расмий саҳифасида ушбу суҳбатларни "ажойиб" деб таърифлади. Мулоқот давомида томонлар дунёда давом этаётган низоларни тинч йўл билан ҳал этишнинг муҳимлигини алоҳида таъкидлаганлар. Шунингдек, АҚШнинг Ўзбекистон ва Қозоғистон билан савдо-иқтисодий алоқаларини ҳамда ўзаро ҳамкорликни кенгайтириш масалалари муҳокама қилинган.
Келгуси йили АҚШ "Катта йигирмалик" (G20) саммитига мезбонлик қилади. Дональд Трампнинг таъкидлашича, Маямида ўтадиган ушбу нуфузли тадбирга Ўзбекистон ва Қозоғистон етакчилари меҳмон сифатида иштирок этиш учун расмий таклифнома оладилар.
Оқ уй раҳбари ўз баёнотида Марказий Осиёнинг икки йирик давлати билан бўлган жорий муносабатларни "аъло даражада" деб баҳолаган.
Эслатиб ўтамиз, жорий йилнинг 6 ноябрь куни Вашингтон шаҳрида АҚШ президенти Доналд Трамп ва Ўзбекистон Республикаси президенти Шавкат Мирзиёев икки мамлакат ўртасидаги йирик инвестиция ва иқтисодий ҳамкорлик келишувларини эълон қилишганди.
Изоҳлар мавжуд емас