Ўзбекистон, Тошкент - Batafsil.uz. Ўзбекистонда 11 ойда 10,22 мингта ёнғин содир бўлган, бу ўтган йилнинг шу даврига нисбатан 17 фоизга кўпдир. Ёнғинларнинг асосий сабаблари оловга эҳтиётсизлик билан муносабатда бўлиш, шунингдек, иситиш печлари ва электр жиҳозларидан нотўғри фойдаланиш бўлиб қолмоқда.
Бу ҳақда Олий Мажлис Қонунчилик палатаси мажлисида Фавқулодда вазиятлар вазири Ботир Қудратхўжаев маълум қилди.
Унинг сўзларига кўра, ёнғинлар оқибатида 112 киши жароҳатланган, 67 киши ҳалок бўлган.
Вазирнинг маълум қилишича, давлат назорати органларида ҳисобда турган 323,09 мингта корхона ва ташкилотдан 79,43 мингтасида текширув ўтказилган. Ёнғин хавфсизлиги талабларини бузганлик учун 51,82 минг раҳбар, масъул ва фуқаро маъмурий жавобгарликка тортилган. Қўлланилган жарималарнинг умумий миқдори 31,8 миллиард сўмни ташкил этди.
Бундан ташқари, аниқланган қоидабузарликлар ёнғинларга олиб келиши мумкин бўлган 22,64 мингта объектнинг фаолияти вақтинча тўхтатилди. Шунингдек, 112,53 мингта носоз электр қурилмалари электр таъминотидан узилган.
Мактабгача таълим ташкилотлари ва умумтаълим мактабларида ўтказилган ўрганишлар давомида 68,54 мингта ёнғин хавфсизлиги талаблари бузилганлиги аниқланиб, шундан 32,06 мингтаси бартараф этилганлиги алоҳида қайд этилди.
Эслатиб ўтамизки, яқинда Тошкентнинг Яшнобод туманидаги "Авиасозлар" (собиқ "Кадишева") бозори ҳудудида ёнғин содир бўлганди.
Изоҳлар мавжуд емас